LUKASI 7 - Ha`bari Ndjema ya I Maore

Insa asuzihira murumizi wa shitswa wa madjeshi ya Romu

¹ Insa ɓaanda amalidza piya marongozi yahe ha wale wakomuvulishia, angia ɗagoni Kafarnaumu.

² Na hule v̄uka shitswa wa madjeshi akana murumizi akomuv̄endza ha kusudi, na waye aka muwaɗe halisi, ata aka kariɓu na ufa.

³ Ɓaanda akia haɓari zapatana na Insa, amuv̄eleshea ɓaãdhwi ya watru waɓole wa Mayahudi, ile wandre wamumiye aje av̄onese murumizi wahe.

⁴ Wakati wawaswili mbeli za Insa, wamurayi ha kusudi ha umuambia: «Uwo mutru astahiki umukuɓaliye hadja yahe,

⁵ mana waye uv̄endza ikaɓila yatru, tsena waye ɗe ariwashia inyumba ya uswali yatru.»

⁶ Ɓas, Insa awaɗungu. Ata ukuruɓia yahe inyumba, shitswa wa yamadjeshi ule av̄eleha wandzani wahe wamuambiye: «Mutukufu, usudzitaãɓishe, mana wami tsastahiki wawe ungia ɗagoni hangu.

⁷ Tsena, iyo ɗe imana ata nadziona amba tsastahiki uja mbeli zaho. Ɓadi rongoa tu trongo, na murumizi wangu atsov̄ona.

⁸ Mana wami nilio utsini mwa ziãmuri za waɓole wangu, tsina madjeshi walio utsini mwangu. Ata namoambia moja: ‹Endra›, na waye uendra; au wangina: ‹Ko›, waye uja; au tsena, namoambia murumizi wangu: ‹Fanya jau›, ɓas waye uifanya.»

⁹ Wakati Insa akia marongozi yale, ashanga na mutru ule. Sa ile azingi, aambia idunia ile yakomuɗunga: «Nisumuambiani amba ata hari mwa iIsraila, ne tsapara uaminifu muɓole mauri ɗe unu.»

¹⁰ Ata wale waka warumwa wamoregea ɗagoni, wapara amba murumizi ule av̄ono.

Insa asuregeza hayi mwana mutruɓaɓa wa mutrumushe afiliwa na mume wahe

¹¹ iSuku yaɗunga, Insa andre hari mwa ɗago lihiriwao Nainu. Maswihaɓa yahe na dunia ya watru waka hari mwa ndzia moja na waye.

¹² Upara yahe kariɓu na umulongo wa liɗago, v̄wa hirimu mutruɓaɓa mwana moja-moja wa mutrumushe afiliwa na mume wahe, av̄ingwa akondrodzihwa. Tsena v̄uka watru wengi tu wa shi ɗagoni v̄ale waɗungana na mama ule.

¹³ Wakati Raɓi amuona, asikwa na poreho na waye, amuambia: «Usulile.»

¹⁴ Atsengelea, asiki idjanaiza ile. Sa ile wale waka waiv̄inga, wazia. Ɓas, Insa arongoa: «Ɓaɓa, nisuhuambia, hima!»

¹⁵ Mufu ule aketsi, aandrisa ulagua. V̄ale Insa amuregezeawo mayahe.

¹⁶ Piya watru wasikwa na faza, wamutukuza Mungu ha urongoa: «Mutrume muɓole aja av̄enuha hari mwasi!» Na tsena: «Mungu aja aangalia umati wahe.»

¹⁷ iHaɓari ya Insa ini ienea hari mwa piya iYudeya na piya yimikaɓala djirani.

Yahaya Muɓaĩshizi asuv̄eleha watru ha Insa

¹⁸ Yahaya ajudziwa na maswihaɓa yahe piya trongo zile.

¹⁹ Wakati ule ahiri waili, awav̄eleha ha Insa wamudzise: «Hali wawe ɗe mutru akolazimu aje, au rilindre wangina?»

²⁰ Watru wale wamowaswili mbeli za Insa, wamuambia: «Yahaya Muɓaĩshizi ariv̄eleha haho rihudzise neka wawe ɗe mutru akolazimu aje, au rilindre wangina.»

²¹ Na wakati ɗe uwo ule, Insa azihira watru wengi wendza mawaɗe, wendza zifeli, wendza madjini ya peu, tsena wafa-matso wengi awazihira waone.

²² Ɓas, sa ile Insa awaambia: «Namwendre mwamuambiye Yahaya izo mwaziona na uzikia. Wafa-matso wasuona, magoɓo yarengelea uendra, waenefu watwaharishiwa, wafa-makio wasukia, wafu wasuregezewa hayi, na iHaɓari Ndjema isujudziwa ha zimasikini.

²³ Tsena furaha ha uwo tsarendreha siɓaɓu ya waye ukwala.»

²⁴ Wakati watru wale waka warumwa na Yahaya walawa, Insa aambia idunia ile zamuhusu Yahaya: «Trini ɗe mwakwendra muiangaliye padzaju? Sandze liv̄udziwao na pev̄o?

²⁵ Ɓasi trini ɗe mwakwendra muiangaliye? Mutru apindra vao dzuzuri? Nisumuambiani amba wapindrao vao dzuzuri, waẽshio ha masterehi, wa moni na zinyumba za mafalume.

²⁶ Ɓasi trini ɗe mwakwendra muiangaliye? Mutrume? Ewa, nisumuambiani, tsena zaidi rahana mutrume.

²⁷ Waye ɗe mutru arongolwa hari mwa uMuangishio amba: ‹Tsami nisuv̄eleha murumwa wangu ahutranguliye, arengeledze indzia yaho mbeli zaho.›

²⁸ Ɓasi nisumuambiani, hari mwa wao wadzalwa na wamayawo, kav̄u muɓole rahana Yahaya. Ɓadi mutru alio amba ɗe muv̄ungufu hari mwa uUtawalizi wa Mungu, uwo muɓole rahana waye.»

²⁹ Piya uwatru wamukia, ata maliv̄isa-latete|muliv̄isa-latete, wakuɓali amba Mungu wa haki; waidhiɓitisha ha uɓaĩshiwa umuɓaĩsho wa Yahaya.

³⁰ Ɓadi watru wa ishama ya Mafarisayo na wajuzi wa sharia, ha iv̄o wahara uɓaĩshiwa na waye, v̄av̄o kawakuɓali yamav̄endzeleo ya Mungu hawoju.

³¹ Insa arongoa raha: «V̄av̄o watru wa leo nitsowafanisa na mbani? Tsena wasufana na watru trini?

³² Wasufana na wanatsa waketsi shandzahariju, waambianao wao na wao: ‹Rimuremeani ndzumari, ɓadi kamwazina; rihimbi himbo za muswiɓa, ɓadi kamwalila.›

³³ Mana Yahaya Muɓaĩshizi aja, waye kaɗya dipe wala kanwa maji ya zaɓiɓu, na wanyu musurongoa amba ana shetwani.

³⁴ uMwana wa Mwanadamu aja, asuɗya na unwa, na wanyu musurongoa: ‹Namuangaliye, waye muv̄endza uɗya na unwa, mwandzani wa maliv̄isa-latete na wa maãswifu!›

³⁵ Ɓadi ihikima ya Mungu idhiɓitishiwa amba ndjema na piya wao waikuɓali.»

Insa nyumbani ha Simoni Mufarisayo

³⁶ Suku, Insa akariɓisiwa na Mufarisayo amba andre aɗye hahe. Ɓas, Insa angia ha Mufarisayo ule, aketsi akoɗya.

³⁷ Na ɗagoni v̄ale v̄uka mutrumama mwendza taɓia mbi. Wakati ajua amba akoɗya ha Mufarisayo ule, av̄ingi shiya ya alibastera yaka yajaya marashi,

³⁸ ahimi nyuma na Insa mindruni hahe, alili ata matsozi yahe yakoandrisa uyilodza. Ayiv̄angua ha zinyole zahe, ayiɓusu, amwesa ayiv̄aha marashi.

³⁹ Wakati Mufarisayo ule aka amukariɓisa aona trongo ile, adziambia: «Na djeli mutru unu aka mutrume, atsojua amba mbani na namuna trini ya mutrumama unu amuv̄av̄atsao, atsojua amba waye muãswifu.»

⁴⁰ Sa ile Insa amuambia: «Simoni, tsina trongo nitsahao nihuambiye.» Ule amudjiɓu: «Rongoa Fundi.»

⁴¹ Insa amuambia: «V̄uka mukopesha-marike, akana watru waili akowayia. Wa handra akotsahwa mapauni hamsumiya, na wa v̄ili hamsini.

⁴² Ɓasi ɓaanda kawakana ya uliv̄a, awaswamihi wao waili deni yawo. V̄av̄o uv̄i ɗe atsomuv̄endzao rahana munyahe?»

⁴³ Simoni adjiɓu: «Nisufikiri amba ɗe ule aswamihiwa zinyengi.» Insa amuambia: «Unamua fetre.»

⁴⁴ Amwesa azingia mutrumama ule, amuambia Simoni: «Usuona mutrumama unu? Tsingia nyumbani haho v̄anu, wala kwaniv̄a maji ya uhosa yimindru. Ɓadi waye ayilodzo ha matsozi yahe, tsena ayiv̄angua ha zinyole zahe.

⁴⁵ Kwaniɓusu, ɓadi waye rangu nangia v̄anu kazia uniɓusu yimindru.

⁴⁶ Kwanitria ata matra shitswani, ɓadi waye aniv̄aha marashi yimindru.

⁴⁷ Iyo ɗe imana nihuambiao, madhambi mengi yahe yaswamihiwa, mana av̄endze ha kusudi. Ɓadi mutru aswamihiwa mwanapav̄i, uv̄endza mwanapav̄i.»

⁴⁸ Amwesa aambia mutrumama ule: «Madhambi yaho yaswamihiwa.»

⁴⁹ Watru wakoɗya v̄umoja na waye v̄ale waandrisa udziambia: «Unu mbani ata aswamihio yamadhambi?»

⁵⁰ Ɓadi Insa amuambia mutrumama ule: «Uaminifu waho uhuhuyi; endra ha usalama.»