3 YUHANI 1 - Ha`bari Ndjema ya I Maore

¹ Wami, muɓole wa iDjama Ndziwaminifu, nisuhuangishia wawe muv̄endzewa Djayusu nihuv̄endzao hari mwa ikweli.

² Wawe muv̄endzewa, nisutumainia uke fetre hari mwa piya yimikaɓala, tsena uke hari mwa swiha ndjema, mauri iroho yaho namuna ilio fetre.

³ Kweli amba tsijiv̄iwa ha kusudi iv̄o wananya wa uaminifu waja, tsena walawia ushahidi ikweli ulionayo, na inamuna udziv̄ingao hari mwa ikweli.

⁴ Tsisina furaha ɓole rahana ukia amba wana wangu hari mwa uaminifu wasuẽshi hari mwa ikweli.

Djayusu asutrilwa ɓari asaidi uwav̄ingizi wa iHaɓari

⁵ Wawe muv̄endzewa, usudziv̄inga ha uaminifu hari mwa piya izo ufanyao ha uwananya wa shi uaminifu, ata ha wao walio wadjeni.

⁶ Wao walawa ushahidi mbeli za iDjama Ndziwaminifu iuv̄endza yaho. Utsofanya fetre neka uwasaidi amba waendreleye na musafara wawo, ha namuna yastahiki Mungu.

⁷ Mana ɗe ha siɓaɓu ya lidzina la Kristi ɗe wao walawa, ɓila upara itsokao yotsi ha wale kawamuji Mungu.

⁸ Ɓasi v̄av̄o wasi rilazimu rirenge ha uzuri watru mauri ɗe wao, ile rike washangirizi na wao hari mwa uendresa mbeli ikweli.

Diyutrifusa na Dimitriyusu

⁹ Tsiangishia wana trongo iDjama Ndziwaminifu ɓadi Diyutrifusa, av̄endzao ake shitswa, kasurikuɓali.

¹⁰ Iyo ɗe imana ata amba neka nisuja, nitsoeledza zitrendrwa zahe azifanyao ha utsambadza marongozi maovu kinyume na wasi. Wala tsi ɓasi tu, ɓadi waye-waye kasurenga wananya wa uaminifu, na wao watsahao wawarenge, ne asuwaɓalidza, tsena asuwaĩdzia hari mwa iDjama Ndziwaminifu.

¹¹ Wawe muv̄endzewa, wasutiɓe imbovu, ɓadi indjema. Uwo afanyao indjema, waye wa shi Mungu. Uwo afanyao imbovu, waye kamuji Mungu.

¹² Husuana na Dimitriyusu, watru piya wasumulawia ushahidi mwema, na ikweli wiyo-wiyo ne isumulawia ushahidi. Wasi wajau risumulawia ushahidi, amwesa usujua amba ushahidi watru, uwo kweli.

Ha ulindrilia rionane raha

¹³ Tsina nyengi za uhuangishia, ɓadi tsisutsaha naifanya ha nyongo na kalamu.

¹⁴ Nisutumaini uja nihuone tsi hale, v̄av̄o ritsohadisi maswa ha maswa.

¹⁵ Utrulivu nauhuendreleye. Wandzani wasuhusalimu. Salimu uwandzani, kula moja ha lidzina lahe.