2 YUHANI 1 - Ha`bari Ndjema ya I Maore

¹ Wami, muɓole wa iDjama Ndziwaminifu, nisumuangishia Ɓweni mutsahuliwa, na wana wahe niwav̄endzao hari mwa ikweli. Wala tsi wami tu ɗe niwav̄endzao, ɓadi wajau piya wao wajuao ikweli

² wasuwav̄endza ha siɓaɓu ya ikweli ilio moni hatru, tsena itsokao v̄umoja na wasi ha daima:

³ Neema, urehema, na amani zilawao ha Mungu amma Ɓaɓa na ha Insa-Kristi, uMwana wa Ɓaɓa, zitsoka v̄umoja na wasi hari mwa ikweli na iuv̄endza.

Ãmuri yalawa ha Ɓaɓa

⁴ Tsifurahishiha ha kusudi, iv̄o napara ɓaãdhwi hari mwa wana waho walio amba wasuɗunga ikweli, ulawana na iãmuri raipara ha waye Ɓaɓa.

⁵ Na av̄asav̄anu Ɓweni, nisuhumia, wala iyo tsi ãmuri pia nihuangishiao, ɓadi ɗe iyo raipara rangu mwandro, amba riv̄endzane wasi na wasi.

⁶ Na uv̄endza ɗe ini, amba uendra ha uɗunga ziãmuri zahe. Iyo ɗe iãmuri mwaikia rangu mwandro, pare muẽshi hari mwayo.

⁷ Kweli amba wengi wa madangamanyifu watsambadziha ulemenguni, watru kawasukuɓali amba Insa-Kristi aja ha mwili. Uwo ɗe uMudangamanyifu amma uMukanyusha-Kristi.

⁸ Ɓasi namudzitahadharishe mwasulatse mavuna ya ihazi yatru, ɓadi mupare thawaɓu ndzikamilifu.

⁹ Mutru yotsi andrao mbali tsena kasuɓaki hari mwa umusomo wa Kristi, kasina uv̄umoja na Mungu. Uwo aɓakio hari mwa musomo uwo, ana uv̄umoja na Ɓaɓa amma na uMwana.

¹⁰ Neka mutru asumujiliani ɓila uv̄inga musomo uwo, mwasumukariɓise hanyu, tsena mwasumuɓushuriye uwema.

¹¹ Mana uwo amuɓushuriao uwema, v̄av̄o asurenga fuvu hari mwa zitrendrwa mbovu zahe.

Ha ulindrilia rionane raha

¹² Wala ukana amba tsina nyengi za umuangishiani, tsatsaha naifanya ha karatasi na nyongo. Ɓadi nisutumaini ujomuonani nilaguwe na wanyu maswa ha maswa, ile furaha yatru ikamilishihe.

¹³ Wana wa mwananyaho mutrumushe mutsahuliwa wasuhusalimu.