2 MATESALONIKA 3 - Ha`bari Ndjema ya I Maore

Ɓaulusu asutsaha mamilio ha Matesalonika

¹ Yaɓaki v̄anu wananya wa shi uaminifu, namurifanyiye mamilio, ile urongozi wamuhusu Raɓi wendre mbeli amwesa utukuzihe, mauri ɗe inamuna ulio hanyu,

² tsena rikombolwe na watru wapeu tsena waovu; mana tsi piya ɗe waliona uaminifu.

³ Ɓadi Raɓi, waye muaminifu, atsomuhodarishani na umuhifadhwini na uMovu|Movu.

⁴ Ha uv̄umoja watru na Raɓi, risuyakinisha amba musufanya, tsena mutsofanya raha izo ramuambianizo.

⁵ Raɓi naendrese roho zanyu hari mwa uv̄endza wa Mungu na ustahamilivu wa Kristi.

Ndjema mutru ufanya hazi

⁶ Risumusariɓiani wananyatru ha lidzina la Raɓi Insa-Kristi, mudziɓause na kula mwananya wa shi uaminifu aliona maẽsha yendza musadjadja, ɓadi tsi ha uɗunga maosio ramuv̄aniwo.

⁷ Wanyu-wanyu musujua inamuna yalazimu mudziv̄inge ha urenga mufano watru, mana karaẽshi v̄umoja na wanyu shi watru wendza musadjadja;

⁸ karaɗya ɓure-ɓure shahula ya mutru atsokao yotsi. Ha kinyume, ridzirumu ha utaãɓifu, rifanya hazi uku na mutsana, ile rasuke djukumani ha mutru atsokao yotsi hari mwanyu.

⁹ Tsi amba karakana ifurswa, ɓadi ritsaha rimuv̄eni hatruju mufano wa utiɓa.

¹⁰ Mana kweli amba wakati raka v̄umoja na wanyu, rakomuv̄ani sariɓu lini: «Neka mutru kasutsaha afanya hazi, ɓasi v̄av̄o asuɗye».

¹¹ Na v̄anu risukia amba v̄wa ɓaãdhwi ya wanyu wasuẽshi ha shimusadjadja, kawasufanya trongo neka tsi ushahiliha na za wanyawo.

¹² Ɓasi watru wao risuwaãmurisha na uwatria ɓari ha lidzina la Raɓi Insa-Kristi, amba wafanye hazi ha utrulivu na uɗya nguvu za mwili zawo.

¹³ Yahusu wanyu wananya wa shi uaminifu, mwasulemewe ufanya ndjema.

¹⁴ Neka v̄wa mutru kasutuĩ marongozi yatru hari mwa liɓarua lini, namumutriye ãlama, tsena mwasushahilihe na waye hari mwa itsokao yotsi, pare aone haya.

¹⁵ Ɓadi mwasumurenge amba ãduwi, ɓe namumurudi mauri mwananya.

Mamilio na masalamu

¹⁶ Ɓasi Raɓi Monyewe utrulivu namuv̄eni waye-waye utrulivu kula wakati, ha kula namuna. Raɓi nake v̄umoja na wanyu piyanyu.

¹⁷ Salamu lini nisuliangiha ha umuhono wangu wami Ɓaulusu. Unu ɗe umuhuri wangu hari mwa piya maɓarua yangu, iyo ɗe ihatwi yangu.

¹⁸ iRehema ya Raɓi watru Insa-Kristi naimuendreleyeni piyanyu.