2 MATESALONIKA 2 - Ha`bari Ndjema ya I Maore

uMovu atsojao kaɓula ya umuregeo wa Insa

¹ Risumumiani wananyatru, yahusu umuregeo wa Raɓi watru Insa-Kristi na umungulidzano watru na waye,

² musudzilishe mwaɓaɓanyisiwa ha upesi zifikira, wala mwahafilishiwa, neka ha marongozi ya shi mutrume yashukidziwa, au ha kalima, au ha ɓarua lirengwao mauri lilawa hatru, amba isuku ya umuregeo wa Raɓi iwaswili.

³ V̄usuke ata mutru amudanganyani ha namuna itsokao yotsi, mana ilazimu iKufuru ije raɓuzi, na uMovu av̄enuhe, uwo ahetsiwa amba aangamidziwe.

⁴ Uwo ɗe uMukanyusha adzihedzao uju na kula ihiriwao mungu, kula iãɓuduwao, tsena andrao ata aketsi moni mwa iNyumba Ndzitwaharifu ya Mungu, amwesa adzielehe amba ɗe Mungu.

⁵ Hali kamusufahamu amba nakomuambiani trongo zini wakati raha naka hanyu?

⁶ Na wanyu musujua iyo imuziao av̄asa, ile av̄enuhe wakati wahe wahetsiwa.

⁷ Mana iãdjaɓu ya uovu madza isurendreha; ilazimu tu amba uwo aiziao av̄asa, asuke.

⁸ V̄av̄o iv̄o, uMovu atsov̄enuha, alio amba Raɓi Insa atsomuangamidza ha pumu za ihanyo yahe, atsomuzima hatwi ha umuwalio wa umujilio wahe.

⁹ uMuv̄enulio wa uMovu uwo utsorendreha ha zitrendro za Shetwani, v̄umoja na kula namuna ya midjuza, ãlama za ãdjaɓu, na ãdjaɓu ndzinafiki,

¹⁰ v̄umoja na kula namuna ya udangamanyifu movu wa wao wandroangamiao. Watsoangamia mana kawakuɓali iuv̄endza ya ukweli pare wahuyiwe.

¹¹ Iyo ɗe imana amba Mungu asuwav̄eleshea udjandja wendza nguvu, pare waamini itrambo,

¹² ile piya wao kawaamini ukweli, ɓadi wajiv̄iwa na uovu, wahukumulwe.

Wanyu mwatsahulwa na Mungu, namudzihodarishe

¹³ Hatruju wasi, risulazimu rimuhimidiye Mungu ha daima ha siɓaɓu ya wanyu wananya wa shi uaminifu wav̄endzewa wa Raɓi, mana Mungu amutsahuani rangu mwandro mupare ukombofu ha iRoho itwaharishao na ha uaminifu wa ukweli.

¹⁴ Ɗe ha izo tsena ɗe amuhirani ha indzia ya Indjili yatru, ile mupare utukufu wa Raɓi watru Insa-Kristi.

¹⁵ Ɓasi ha izo wananya wa shi uaminifu, namuke watru wasika, musike hodari yimisomo ramuv̄aniyo, neka ha hanyo, au ha ɓarua.

¹⁶ Ɓasi Raɓi watru Insa-Kristi waye-waye na Mungu amma Ɓaɓatru alio amba ariv̄endze, tsena aridjaãlia ha ineema yahe mutrilio-ɓari wa daima na tama ndjema,

¹⁷ nawatriye ɓari ziroho zanyu, na umuhodarishani hari mwa kula shitrendro ndjema na urongozi mwema.