2 MATESALONIKA 1 - Ha`bari Ndjema ya I Maore

¹ Wami Ɓaulusu, v̄umoja na Silvanus na Timutausu, ha iDjama Ndziwaminifu ya Matesalonika ilio hari mwa uv̄umoja na Mungu amma Ɓaɓatru na Raɓi Insa-Kristi:

² Urehema na amani zalawa ha Mungu amma Ɓaɓa na Raɓi Insa-Kristi nazimuendreleyeni.

Himida na mamilio

³ Ha dahari irilazimu rimuhimidiye Mungu, wananya wa shi uaminifu, ha siɓaɓu ya wanyu. Iyo haki amba riifanye, mana uaminifu wanyu usuhua ha kusudi, na uv̄endza wa kula moja ha uwanyawe usendra na uengedzeha.

⁴ Ha izo, risudziɓua ha siɓaɓu ya wanyu hari mwa ziDjama Ndziwaminifu za Mungu, ha ustahamilifu wanyu na uaminifu wanyu hari mwa piya matreso yanyu na maondo muyav̄irao.

⁵ Uwo udhiɓitifu amba hukuma ya Mungu, iyo ya haki, pare muonehane amba mustahiki Utawalizi wa Mungu, ulio amba ha siɓaɓu yawo ɗe muondeshehao.

⁶ Kweli Mungu wa haki: atsoondesha wao wamuondaoni,

⁷ tsena amuv̄eni wanyu muondeshehao, uv̄umuzi v̄umoja na wasi, wakati wa umuv̄enulio wa Raɓi Insa ulawa mbinguni v̄umoja na malayika zendza ushindzi zahe.

⁸ Atsov̄enuha moni na jenge la moro, ile aãdhiɓu wao kawasumujua Mungu na wao kawasutuĩ iIndjili ya Raɓi watru Insa.

⁹ Watru wao, iãdhaɓu yawo itsoka uangamifu wa daima, mbali na isura ya Raɓi na utukufu wa ushindzi wahe,

¹⁰ wakati isuku iyo atsojao atukuziwe ha watwaharifu wahe, na usifiwa ha piya wao itsokao amba waamini. Na wanyu wajau mutsoka, mana muamini ushahidifu watru.

¹¹ Iyo ɗe imana dahari rimufanyiaoni mamilio, ile Mungu watru amuoneni amba mustahiki muhirio wahe, tsena atsimidze ha ushindzi wahe kula nia ndjema mulionayo, na kula shitrendro muifanyao ha uaminifu.

¹² V̄av̄o lidzina la Raɓi watru Insa litsotukuziha hanyuju, na wanyu haheju, ha ulingana na irehema ya Mungu watru na ya Raɓi Insa-Kristi.