1 YUHANI 5 - Ha`bari Ndjema ya I Maore

Ushindrifu watru ha uaminifu

¹ Mutru yotsi aaminio amba Insa ɗe Kristi, uwo adzalishiha shi Mungu, na yotsi av̄endzao umudzazi, uv̄endza wajau ule adzalishiha shi waye.

² Namuna ini risujua amba risuv̄endza uwana wa Mungu, neka risumuv̄endza Mungu na utuĩ ãmuri zahe.

³ Mana uv̄endza Mungu ɗe utuĩ ãmuri zahe. Na ãmuri zahe kazisi ndziro,

⁴ mana kula adzalishiha shi Mungu waye ushindra lidunia. Na ushindrifu washindra lidunia, ɗe uaminifu watru.

⁵ Mbani ɗe ashindra lidunia neka tsi ɗe uwo aaminio amba Insa ɗe uMwana wa Mungu?

Ushahidi husuana na Insa-Kristi

⁶ Ɗe waye Insa-Kristi ɗe aja ha yamaji na idamu; tsi ha yamaji tu, ɓadi ha yamaji, tsena ha idamu; amwesa iRoho ɗe ilawao ushahidi, mana iRoho ɗe ikweli.

⁷ Mana v̄wa traru zilawao ushahidi:

⁸ iRoho, yamaji, na idamu. Na izo traru zisurongoa moja.

⁹ Neka amba wasi ukuɓali ushahidi wa wanadamu, ɓasi ushahidi wa Mungu uwo uzidi, mana ushahidi wa Mungu ɗe amba asutolea ushahidi uMwana wahe.

¹⁰ Mutru aaminio uMwana wa Mungu, waye ukana ushahidi uwo moni hahe. Uwo kasuamini Mungu, asumufanya munafiki, iv̄o kasuamini ushahidi Mungu autoa ju la uMwana wahe.

¹¹ Na ushahidi uwo ɗe amba Mungu ariv̄a uhayati wa daima, na uhayati uwo uka hari mwa uMwana wahe.

¹² Monyewe ukana uMwana, ana uhayati; uwo kasina uMwana wa Mungu, kasina uhayati.

Marongozi ya mwiso

¹³ Tsimuangishiani zini pare mujuwe amba muna uhayati wa daima, wanyu muaminio ha lidzina la uMwana wa Mungu.

¹⁴ Na yakini rilionayo na waye, ɗe amba yotsi riimiao ha mav̄endzeleo yahe, waye urivulishia.

¹⁵ Na neka risujua amba asurivulishia yotsi riimiao, risujua amba rina iyo ramumiayo.

¹⁶ Neka mutru asuona munyahe wa shi uaminifu afanyao dhambi kaliv̄ingi hari mwa ufa, nafanye mamilio, na v̄av̄o Mungu atsov̄a uhayati mwananya uwo. Iyo isurongoa ɗe wao wafanyao madhambi yalio amba kayav̄ingi hari mwa ufa. V̄wa dhambi liv̄ingao hari mwa ufa. Tsi ɗe lilo ɗe nirongoao amba mutru amiliye.

¹⁷ Kula mbovu uka amba dhambi, ɓadi v̄wa dhambi kaliv̄ingi hari mwa ufa.

¹⁸ Risujua amba mutru yotsi adzalishiha shi Mungu kaãswi, mana umudzalishiha shi Mungu ule umuhifadhwi, na uMovu|Movu kamupara.

¹⁹ Risujua amba wasi wa shi Mungu, na ulemengu kamili wa hari mwa ushindzi wa uMovu.

²⁰ Risujua raha amba uMwana wa Mungu aja, tsena ariv̄a iãkili ya ujua Uwo alio wa kweli. Na wasi rina uv̄umoja na Uwo alio wa kweli, ha wasi ukana uv̄umoja na uMwana wahe Insa-Kristi. Waye ɗe uMungu wa kweli, amma uhayati mukamilifu wa daima.

²¹ Wana wangu, namudzifahamishe na masanamwe!