1 YUHANI 1 - Ha`bari Ndjema ya I Maore

Urongozi wa Uhayati

¹ Trongo ilio amba ika rangu mwandro, trongo raikia, trongo raiona ha yamatso yatru, trongo raistamia na uisika ha yimihono yatru, trongo yahusu Uwo alio Urongozi wa uhayati, ɗe rimujudzaoniyo.

² Mana uhayati uwo uv̄enuha; wasi riuono, risuulawia ushahidi, tsena risumujudzani uhayati mukamilifu wa daima waka ha waye Ɓaɓa, amwesa wariv̄enushia.

³ Trongo raiona na uikia, risumujudzaniyo wanyu wajau, ile wanyu wajau mukane uv̄umoja na wasi. Na v̄av̄o uv̄umoja watru wa na waye Ɓaɓa, na Mwana wahe Insa-Kristi.

⁴ Na iyo risuiangiha, ile pare furaha yatru ikamilishihe.

Mwendro hari mwa heu

⁵ iHaɓari raikia na waye tsena rimujudzaoni, ɗe amba Mungu waye heu, na haheju kav̄u ata shidza.

⁶ Neka risurongoa amba rina uv̄umoja na waye, amwesa risendra hari mwa shidza, v̄av̄o risurongoa trambo, tsena karisurendra ikweli.

⁷ Ɓadi neka risendra heuni, mauri waye-waye alio heuni, v̄av̄o ra hari mwa uv̄umoja wasi na wasi, amwesa idamu ya Insa, Mwana wahe, isurirahatsa na kula dhambi.

⁸ Neka risurongoa amba karisina dhambi, v̄av̄o risudzilaɓa, tsena ikweli kaisi moni hatru.

⁹ Ɓadi neka risukuɓali madhambi yatru, waye muaminifu, tsena mwendza haki. Ɓasi atsoriswamihi madhambi yatru, na urirahatsa na kula uovu.

¹⁰ Neka risurongoa amba karaãswi, v̄av̄o risumufanya munafiki, tsena urongozi wahe kausi hatruju.