1 MATESALONIKA 5 - Ha`bari Ndjema ya I Maore

Namuke tayari na isuku ya umuregeo wa Raɓi

¹ Ɓasi wananyatru, hari mwa isa na uwakati trongo zizo zitsohidjirio, tsi paka muangishiwe.

² Mana wanyu-wanyu musujua ha uzuri amba isuku ya Raɓi itsoja mauri mwidzi ukwari.

³ Wakati watru watsorongoao amba: «Nafasi na hifadhwi za v̄av̄o!», ɓasi wakati uwo kamwe uangamifu utsowajilia ɓila udzilindrilia, mauri shikodza ha mutrumama mwendza hamili, amwesa kawatsoshindra watrala.

⁴ Ɓadi wanyu, wananya wa shi uaminifu, kamusi hari mwa shidza amba isuku iyo imuhiliɓuni mauri mwidzi.

⁵ Mana piyanyu mwa wana wa iheu na wana wa mutsana. Wasi karisi wa uku, wala wa shidza.

⁶ Ɓasi ha izo, rasulale mauri wasalia, ɓadi narishese, tsena rike wazima.

⁷ Mana wao walalao, ulala uku, na wao wadzilezao, ulewa uku.

⁸ Ɓadi wasi rilio wa mutsana, narike hashiri. Naripindre uaminifu na uv̄endza, zirihifadhwi mauri ngwezi ya shuma, na itama ya uhuyifu mauri kofia ya shuma.

⁹ Mana Mungu karilisha amba wa hadhaɓu zahe, ɓadi ripare uhuyifu ha ndzia ya Raɓi watru Insa-Kristi,

¹⁰ alio amba afu ha tanafu yatru, ile neka risushesa au risulala, riẽshi hari mwa uv̄umoja na waye.

¹¹ Ɓasi ha izo, namutriane ɓari na uhodarishana, mauri ɗe inamuna madza muifanyao.

Maosio ya mwiso na masalamu

¹² Ɓasi wananya wa shi uaminifu, risumumiani, mustehi wao wadzirumao mengoni mwanyu, wamuv̄ingaoni hari mwa uv̄umoja wa Raɓi na umutahadharishani.

¹³ Namuwav̄e hishima ha kusudi na mahaɓa, ha siɓaɓu ya urumishi wawo. Namukane amani wanyu na wanyu.

¹⁴ V̄av̄o wananya wa shi uaminifu, risumutriani ɓari mufahamishe wendza musadjadja, muhodarishe wao wapuha ɓari, musaidiye walemevu, mukane suɓira mbeli za watru piya.

¹⁵ Namutahadhari amba v̄usuke mutru aɗiv̄a mbovu ha mbovu, ɓadi ha daima namuendreleye hari mwa zindjema, rangu wanyu na wanyu, ata ha piya wanadamu.

¹⁶ Ha daima namufurahi,

¹⁷ mufanye mamilio ɓila uzia,

¹⁸ hali yotsi mutsokao namushukuriye, mana hanyuju yao ɗe mav̄endzeleo ya Mungu hari mwa uv̄umoja na Kristi-Insa.

¹⁹ Mwasuɓaliliye iRoho.

²⁰ Mwasudharau marongozi ya shi mutrume yashukidziwa,

²¹ ɓadi namutwaliye piya zitrongo, musike zilio ndjema.

²² Namudziɓalidze na kula aina ya mbovu.

²³ Ɓasi Mungu Monyewe utrulivu waye-waye namutwaharisheni ha ukamilifu piya nafusi yanyu, iroho, umo, na umwili, zilishwe ɓila tuhuma ha umuregeo wa Raɓi watru Insa-Kristi.

²⁴ Monyewe umuhirani waye muaminifu, na waye ɗe atsoifanyao.

²⁵ Wananyatru, namurimiliye wajau wasi.

²⁶ Namusalimu piya uwananya wa shi uaminifu ha masalamu matwaharifu.

²⁷ Nisumurayini ha lidzina la Raɓi, liɓarua lini nalisomewe ha piya uwananya wa shi uaminifu.

²⁸ iRehema ya Raɓi watru Insa-Kristi naimuendreleyeni.