1 MATESALONIKA 1 - Ha`bari Ndjema ya I Maore

¹ Wami Ɓaulusu, v̄umoja na Silvanus na Timutausu, ha iDjama Ndziwaminifu ya Matesalonika ilio hari mwa uv̄umoja na Mungu amma Ɓaɓa na Raɓi Insa-Kristi: Urehema na amani nazimuendreleyeni.

Himida ha siɓaɓu ya uaminifu wa yaMatesalonika

² Dahari wasi umuhimidia Mungu ha siɓaɓu ya wanyu piyanyu, na umurongoani hari mwa mamilio yatru.

³ Wasi unahana kula sa mbeli za Mungu watru amma Ɓaɓa zitrendro za uaminifu wanyu, urumwa wa uv̄endza yanyu, na uhodarifu wa itama mulionayo na Raɓi watru Insa-Kristi.

⁴ Risujua wananya wa shi uaminifu wav̄endzewa wa Mungu amba wanyu mutsahuliwa na waye.

⁵ Mana iIndjili ramujudzaniyo kayamujiliani amba ha marongozi tu, ɓadi tsena ha ushindzi, ha iRoho Ndzitwaharifu, v̄umoja na yakini yaswafishiha. Mana kweli amba musujua namuna jeje rakoka na wanyu, ha tanafu yanyu.

⁶ Na wanyu mufanyiha watiɓizi watru, tsena wa Raɓi, ha ukuɓali Urongozi wa Mungu hari-hari na matreso ha uwengi, tsena v̄umoja na ifuraha ya iRoho Ndzitwaharifu.

⁷ Ha izo muja murendreha mufano ha piya uwaaminifu wa Makadoniya na Akaya.

⁸ Kweli amba Urongozi wa Raɓi ukilihana ulawa hanyu, wala tsi amba hari mwa iMakadoniya na iAkaya tu ɓasi, ɓadi uaminifu wanyu na Mungu ujulihana kula v̄ahanu, ha namuna amba tsi paka rirongowe itsokao yotsi hari mwawo.

⁹ Mana watru wasurongoa husuana na wasi namuna jeje mwarirenga hanyu, na namuna jeje mwaɓuza ha Mungu ha udziɓausa na masanamwe, ile mumurumishiye Mungu alio hayi, tsena wa kweli,

¹⁰ na ulindra ulawa mbinguni uMwana wahe amuregeza hayi ulawa ha uwafu, ne ɗe Insa alio amba asurikomboa na zihadhaɓu zijao.