1 MAKORINTIYO 4 - Ha`bari Ndjema ya I Maore

Mav̄ingizi-Risala, wao warumishi wa Kristi

¹ Ha izo, watru nawarione amba warumishi wa Kristi, madhwamana ya zisiri za Mungu.

² V̄av̄o, trongo itsahwao ha dhwamana, ɗe waye uka muaminifu.

³ Hanguju, iyo trongo titi kaɓisa ya wami unamulwa na wanyu, au na mahakama ya shiuɓinadamu; ata na wami ne tsisudzinamua monyewe.

⁴ Mana tsisudzifahamu na kosa litsokao lotsi, ɓadi kaisi amba v̄av̄o tsirahara. Uwo aninamuao ɗe Raɓi.

⁵ Ɓasi, musutowe unamuzi kaɓula ya uwakati wahetsiwa, kaɓula ya umujilio wa Raɓi atsotoao heuni izo zadzama shidzani na uonesa dhwahiri zinia zilio rohoni. V̄av̄o kula mutru atsopara ulawa ha Mungu sifa yamustahiki.

⁶ Trongo zizo wananyangu, tsizirongoa ju langu na Aɓulusu ha siɓaɓu ya wanyu, ile ha umufano watru mufundrihe imana ya urongozi unu: «Musuv̄iriye izo zaangihwa», ile v̄wasuke mutru mengoni mwanyu aka amba adzijadza ufahari ha uania moja kinyume na wangina.

⁷ Mana mbani ɗe ahutafautishao? Trini ɗe ulionayo amba kwav̄olwayo? Na neka uv̄olwayo, manatrini udzisifuo mauri kwav̄olwayo?

⁸ Madza mukurisiwa! Madza mutadjirisiwa! Musutawala ɓila wasi! Na djeli amba mwakotawala ha kweli! V̄av̄o wasi wajau ratsotawala v̄umoja na wanyu!

⁹ Mana nisuona mauri Mungu arilishi wasi Mav̄ingizi-Risala hari mwa liɓandza la mwiso, mauri watru wahukumulwa waulawe. Mana rielehwa ritseshewe mbeli za ulemengu, zimalayika na uwanadamu.

¹⁰ Wasi ra wajinga ha siɓaɓu ya Kristi, ɓadi wanyu muna hikima hari mwa uv̄umoja wanyu na Kristi; wasi ra walemevu, ɓadi wanyu muna nguvu; wanyu musuv̄olwa hishima, ɓadi tsi wasi.

¹¹ Ata v̄anu, ra hari mwa ndza na nyora, ra wadzi, risuv̄ondrwa, karina makazi.

¹² Risudziruma, risufanya hazi ha yimihono yatru. Ramoruhanwa, risusopelea; ramotreswa, risustahamili;

¹³ ramorongolwa ha unayi, risudjiɓu ha uwema. Rifanyiha tsama za ulemengu, masaha yalatswa, ata upara av̄asa.

¹⁴ Tsi ha umuonesani haya ɗe niangihao trongo zini, ɓadi nisumutahadharishani mauri wana wav̄endzewa wangu.

¹⁵ Mana wala ukana mupara wav̄ingizi alifu kumi hari mwa uv̄umoja wanyu na Kristi, tsi amba muna maɓaɓa wengi. Mana hari mwa uv̄umoja wanyu na Kristi-Insa, wami ɗe namudzani ha ndzia ya iIndjili.

¹⁶ Ɓasi nisumutafadalini murenge mufano wangu.

¹⁷ Iyo ɗe imana nimuv̄elesheaoni Timutausu alio amba hari mwa uv̄umoja na Raɓi, waye mwana wangu muv̄endzewa, tsena muaminifu. Atsomunahanidzani maendreleo yangu hari mwa uv̄umoja na Kristi-Insa, mauri ɗe inamuna niyasomedzao kula v̄ahanu moni na kula Djama Ndziwaminifu.

¹⁸ Ha ufikiri amba tsitsoja namuonani, wasalia wasudzirendra.

¹⁹ Ɓadi tsi hale nitsoja hanyu, neka ɗe mav̄endzeleo ya Raɓi; na v̄av̄o nitsojua, tsi ɗe marongozi, ɓadi ushindzi wa wale wadzirendrao.

²⁰ Mana Utawalizi wa Mungu kawaketsi hari mwa marongozi, ɓadi hari mwa ushindzi.

²¹ Trini ɗe muitsahao? Nije hanyu na shengwe, au v̄umoja na mahaɓa na roho ndzitrulivu?