1 MAKORINTIYO 13 - Ha`bari Ndjema ya I Maore

Uhusu uv̄endza

¹ Wala ukana neka nisulagua ziluha za wanadamu na za malayika, ne tsisina mahaɓa, v̄av̄o tsa garando livumao, au keme za kengele.

² Na neka tsidjaãliwa ineema ya ujudza marongozi ya shi mutrume yashukidziwa, ya ujua piya zisiri, neka tsina piya ujuzi, ata na piya uaminifu ushindrao utsengedze yimilima, ne tsisina mahaɓa, v̄av̄o tsisi shitru.

³ Neka tsianisa piya nilionazo ha zimasikini, ata neka tsidzitoa fidia umwili wavudzwe, ne tsisina mahaɓa, v̄av̄o kaisunifayi na itsokao yotsi.

⁴ Uv̄endza ukana suɓira, na uwema. Uv̄endza kaina uwivu, uv̄endza kaidzirendre, kaidziono,

⁵ kairendre kayalazimu, kaitsaha tanafu yayo, kaidzijadza hasera, kaisiki mbovu rohoni,

⁶ wala kaijiv̄iwa na udhuluma, ɓadi ujiv̄iwa na ikweli,

⁷ uswamihi piya, uamini piya, utumaini piya, ustahamili piya.

⁸ Uv̄endza kaikomo. Ɓadi ujudza marongozi ya shi mutrume yashukidziwao ina mwiso, luha zishukidziwao zitsozia, na ujuzi una mwiso.

⁹ Mana ujuzi watru wa pindri, na umujudzio watru wa marongozi ya shi mutrume yashukidziwa, tsena wa pindri.

¹⁰ Ɓadi ukamilifu wamoja, itsindzikamilifu itsokoma.

¹¹ Wakati naka mwana, nakolagua shi mwana, nakofikiri shi mwana, nakofahamu shi mwana. Ata ufanyiha yangu muɓole, tsilishi shi unatsa ile.

¹² Leo risuona mahiɓuni hari mwa shiɗo, ɓadi meso oho, maswa ha maswa. Leo nisujua pindri, ɓadi wakati uwo oho, nitsojua ha ukamilifu, mauri ɗe inamuna najulihwana.

¹³ Ɓasi v̄anu trongo traru ɗe zilio: uaminifu, tama, na mahaɓa. Ɓadi imahususu ɗe mahaɓa.