1 MAKORINTIYO 12 - Ha`bari Ndjema ya I Maore

Neema zidjaãliwao na iRoho Ndzitwaharifu

¹ Ɓasi zahusu neema za shiroho wananyangu, tsisutsaha yaka amba kamusujua.

² Musufahamu amba wakati kamwakomujua Mungu, mwakopotezewa na uv̄ingwa muãɓudu masanamwe ɓuɓu.

³ Ha izo, nisutsaha muelewe amba kav̄usi alaguao ha iRoho ya Mungu arongoao: «Insa nalaãnwe», wala kav̄usi ashindrao arongowe: «Insa ɗe Raɓi», neka tsi ha iRoho Ndzitwaharifu.

⁴ Kweli amba v̄wa tafauti za neema, ɓadi Roho ɗe wiyo-wiyo.

⁵ V̄wa tafauti za mirumishi, ɓadi Raɓi ɗe waye-waye.

⁶ V̄wa tafauti za hazi, ɓadi Mungu ɗe waye-waye ɗe arendrao piya ha piya.

⁷ Kula mutru udjaãliwa ãlama ionehanao ya umukayo wa iRoho, ha faida ya djimla.

⁸ Moja udjaãliwa ha iRoho urongozi wendza hikima, na wangina urongozi wa ujuzi, ha iRoho ɗe wiyo ile.

⁹ Ha wangina uaminifu ha iRoho wiyo-wiyo, ha wangina ineema ya uzihira, ha iRoho ɗe wiyo-wiyo.

¹⁰ Ha wangina ineema ya ufanya midjuza, ha wangina mujudzio wa marongozi ashukidziwawo, ha wangina ushindzi wa utafautisha ɓaina ya za Roho ya Mungu, na roho yangina. Ha wangina ulagua tafauti za luha ashukidziwazo, na ha wangina ujuzi wa utafaswiri ziluha zile.

¹¹ Na piya trongo zizo urendresheha na Roho moja wiyo-wiyo, adjaãliao kula mutru ha inamuna atsahao.

Ziga nyengi, ɓadi mwili moja

¹² Kweli amba mauri ɗe umwili iv̄o ulio moja ne uliona ziga nyengi, na piya ziga za umwili ha uwengi wazo, wizo mwili moja, ɓasi ɗe ha inamuna iyo wajau ɗe v̄ulio ha Kristi.

¹³ Mana ha Roho moja riɓaĩshiwa piyasi, ile rifanyihe mwili moja ɓas, rangu Mayahudi ata Magiriki, rangu warumwa ata wanafasina, na piyasi rinosewa Roho moja.

¹⁴ Ha izo umwili tsi shiga moja ɓas, ɓadi nyengi.

¹⁵ Na djeli mundru wakorongoa: «Rangu tsisi muhono, wami tsi wa umwili», kaitsoka amba v̄av̄o kausi wa umwili.

¹⁶ Au na djeli kio lakorongoa: «Rangu tsisi dzitso, wami tsi wa umwili», kaitsoka amba v̄av̄o kalisi la umwili.

¹⁷ Na djeli piya umwili uka dzitso, ɓasi ukia utsoka hav̄i? Au na djeli piyawo uka trongo ya ukia, ɓasi uvura harufu utsoka hav̄i?

¹⁸ Ɓadi v̄anu, Mungu ahetsi ziziga moni na umwili, kula moja ha inamuna av̄endza.

¹⁹ Na djeli piya zika shiga moja, umwili utsoka hav̄i?

²⁰ Kweli amba v̄wa ziga nyengi, ɓadi umwili moja.

²¹ Dzitso kalitsojua laambia umuhono: «Tsi paka nike na wawe», wala ishitswa yaambia yimindru: «Tsi paka nike na wanyu».

²² Na zaidi ya v̄av̄o, ziziga za umwili zionehanao amba zilemevu rahana zasalia, izo mahususu,

²³ na izo rizionao amba tsi zendza hishima ɓole hari mwa umwili, risuziv̄a hishima ɓole zaidi. Ha izo, ziga zatru zilio amba kazina sheo, wasi uzitutuɓia,

²⁴ wakati ulio amba zile ziliona sheo, tsi paka rizitutuɓiye. Ɓadi Mungu aungatsa umwili ha namuna ya uv̄a hishima zaidi iyo kayakana,

²⁵ ile pare v̄wasuke mutsapushiano hari mwa umwili, ɓadi piya ziziga ziv̄ingane ha usawa.

²⁶ Na neka shiga moja isuondesheha, zasalia piya uondesheha na wiyo; neka shiga moja isutukuziha, piya zasalia ujiv̄iwa v̄umoja na wiyo.

²⁷ Ɓasi wanyu ɗe umwili wa Kristi, na kula moja shiga ya umwili uwo.

²⁸ Na hari mwa iDjama Ndziwaminifu, Mungu ahetsi handrani Mav̄ingizi-Risala, ya v̄ili watru wajudzao marongozi washukidziwawo, ya raru watru wasomedzao. Yaɗunga ineema ya ufanya midjuza, amwesa ya uzihira, ya usaidi, ya uv̄inga, na ulagua tafauti za luha zashukidziwa.

²⁹ Hali piyawo Mav̄ingizi-Risala? Au piyawo watru wajudzao marongozi ya shi mutrume yashukidziwa? Au piyawo watru wasomedzao? Au piyawo ufanya midjuza?

³⁰ Piyawo wadjaãliwa ineema ya uzihira? Piyawo ulagua luha zashukidziwa? Piyawo utafaswiri luha zile?

³¹ Ɓasi namutsahe ha djitihadi zineema zazidi muhimu. Tsena nisuja nimuoneseni indzia ndzuzuri rahana piya.