1 MAKORINTIYO 10 - Ha`bari Ndjema ya I Maore

Mifahamisho yarengwa hari mwa iIsraila ya hale

¹ Wananyangu, tsisutsaha yaka amba kamwajua amba piya wadzaɗe watru waka utsini na livingu, tsena piyawo wapasua iɓahari.

² Waɓaĩshiwa|uɓaĩsha piyawo ha uv̄umoja na Musa moni na livingu na moni na iɓahari.

³ Piyawo waɗyi shahula ɗe wiyo-wiyo ya shiroho,

⁴ na tsena piyawo wano shinoa ɗe wiyo-wiyo ya shiroho; kweli amba wakonwa shinoa yakolawa hari mwa ɓwe-monye la shiroho lakowaɗunga, na ɓwe-monye lilo lika ɗe Kristi.

⁵ Ɓadi wengini mwawo kawakuɓalishiha na Mungu, ɗe imana waangamia hari mwa lipadza.

⁶ Na zini za mifano hatruju, ile rasukane ngushauku mbovu mauri ɗe izo wakanazo.

⁷ Mwasufanyihe maãɓudu-masanamwe ha mufano wa wasalia mengoni mwawo, mauri ɗe inamuna yaangihwa moni na uMuangishio: «Umati uketsi ile uɗye na unwa, amwesa wahime waangadze.»

⁸ Rasufanye taɓia za shahawa kazalazimu mauri ɗe iheli wasalia mengoni mwawo wafanya, ata v̄wafa indadi ya alifu shirini na traru suku moja.

⁹ Rasumudjereɓu Raɓi mauri ɗe inamuna wasalia mengoni mwawo wafanya, ata waangamidziwa na nyoha.

¹⁰ Mwasungurume mauri wasalia mengoni mwa wao wakonguruma, ata waangamidziwa na uMuangamifu.

¹¹ Na trongo zizo ziwav̄iria ile zike mufano, tsena ziangihwa pare zirifahamishe, wasi rawaswiliwa na uwakati wa mwiso.

¹² Ha izo, monyewe udzifikiria amba alimbala, natahadhari asuje awa.

¹³ Kav̄usi djariɓu lamuparani lashilidzia uɓinadamu. Na Mungu, waye muaminifu. Katsoruhusu mwadjereɓiwa ha uzidisha izo mushindrao. Ɓadi v̄umoja na lidjariɓu, atsohetsi wajau ndzia ile mushindre mulistahamili.

Musurenge fuvu na mazetwani

¹⁴ Ha izo wandzani wa roho wangu, namutrale itrongo ya uãɓudu masanamwe.

¹⁵ Nisulagua mauri na watru wendza fikira, ɓasi namunamuwe wanyu ha wanyu trongo niirongoao.

¹⁶ Hali ishikombe ya himida rihimidiao, v̄av̄o karisurenga fuvu hari mwa idamu ya Kristi? Na lidipe rikutruao, v̄av̄o karisurenga fuvu hari mwa umwili wa Kristi?

¹⁷ Ɓasi iv̄o v̄ulio dipe moja, wasi ha uwengi watru, ra mwili moja, mana piyasi risurenga fuvu hari mwa dipe moja lilo.

¹⁸ Namuangaliye umati wa Israila uv̄andre wa shi mwili: wao waɗyao nyama zatolewa sadaka, hali kawasurenga fuvu na talatala ile latolewa?

¹⁹ V̄av̄o trini ɗe niirongoao? Amba nyama yatolewa sadaka sanamwe, iyo izidi faida? Au sanamwe, iyo shitru yendza mana?

²⁰ Ata hata! Ɓadi iyo waitoao sadaka, isutolewa sadaka mazetwani, ɓadi tsi Mungu. Na wami tsisutsaha mwarenga fuvu na mazetwani.

²¹ Kamushindri unwa hari mwa ishikombe ya Raɓi na ishikombe ya mazetwani; kamushindri renga fuvu hari mwa imeza ya Raɓi na imeza ya mazetwani.

²² Hali risutsaha ritsonge Raɓi akane uwivu? Hali rina nguvu rahana waye?

Namurendre piya ha utukufu wa Mungu

²³ V̄wa warongoao: «Piya ziruhusiwa.» Kweli, ɓadi tsi piya ziliona faida. «Piya ziruhusiwa», ɓadi tsi piya ɗe ziendresao mbeli.

²⁴ V̄usuke ata mutru atsahe faida yahe monyewe, ɓadi ɗe faida ya munyahe.

²⁵ Namuɗye kula nyama iudzishihao ɓazari, wala tsi ha udzitafiti na itsokao yotsi ha siɓaɓu ya minamuzi hari mwa yalazimu na kayalazimu.

²⁶ Mana ishiv̄andre ya tsi ya Mola, na piya izo zilio moni.

²⁷ Neka mutru kasina uaminifu moja na wanyu amukariɓisani, tsena musutsaha mwendre, namuɗye kula mutsoyeleshewao, ɓila tsi ha udzitafiti na itsokao yotsi ha siɓaɓu ya minamuzi hari mwa yalazimu na kayalazimu.

²⁸ Ɓadi neka mutru amuambiani: «Shitru ini ika itolewa sadaka», v̄av̄o musuɗye, ha siɓaɓu ya ule amujudzani, na yiminamuzi hari mwa yalazimu na kayalazimu.

²⁹ Namorongoa amba ha siɓaɓu ya trongo ya minamuzi, tsisurongoa ɗe yanyu, ɓadi ɗe ya mutru ule. Manatrini ata unafasi wangu utsotrilwao hari mwa minamuzi ya mutru wangina?

³⁰ Neka nisuɗya yangu shahula ha uhimidia, manatrini nitsorongolwao ha unayi na ishitru niihimidiao?

³¹ Ha izo, mwamoɗya, au mwamonwa, au tsena yotsi muifanyao, namufanye piya ha utukufu wa Mungu.

³² Musuke siɓaɓu ya ukwalisa, tsi ha Magiriki, wala tsi ha Mayahudi, wala tsi ha iDjama Ndziwaminifu ya Mungu,

³³ mauri ɗe wami wajau namuna nitsahao nijiv̄idze piya watru hari mwa piya zitrongo, wala tsi ha utsaha faida yangu monyewe, ɓadi ya uwengi, ile wahuyiwe.