भजन संग्रह 87 - Sunuwar Bibleमुर आन नें आ किताबम ब्रेक्शो कोराह आ तौ आन कुम्सो। 1 परमप्रभुम आ डांडामी आ सहर सेल्तु। 2 परमप्रभु यावेमी याकूब आ मुर आन बाक्तीके क्येङा सियोन सहर ङा गारो ङा लाप्चो दाक्ब। 3 परमप्रभुम आ सहर आ पर्बम रिम्शो लोव़ पशो बाक्ब। ठेयब सेंदा पा। 4 राहाब नु बेबीलोनम आं कली तुइक्नीस। पलिस्ती आन रागी, टायर नु एथीयोपीया यो मेको नु बाक्नीम। मिनु मेको आन पर्बम “एको नु मेको मेकेर जरमेशो नम” देंनीम। इजीप्त रागी कली राहाब यो देंनीम। भजन संग्रह ६७:४-५ 5 सियोन आ पर्बम चहिं “मुर नेल्ल मेकेर रेन जरमेशो बाक्नीम। मारदे हना नेल्ल क्येङा ठेयबमी मेको कली रिम्शो सेल्शा कोव़ब” देंनीम। 6 परमप्रभु यावेमी जात जात ङा मुर आन नें का का पा आ किताबमी ब्रेक्ब। मिनु “एको नु मेको सियोनमी जरमेशो बाक्ब” दे ब्रेक्ब। ठेयब सेंदा पा। 7 कुम्सो पाइब नु सिल पाइबपुकीमी “आंइ आसीक नेल्ल सियोनम बाक्ब” दे कुम्सो पाइनीम। भजन संग्रह ३६:१० |
© 2011, Wycliffe Bible Translators, Inc. All rights reserved.
Wycliffe Bible Translators, Inc.