भजन संग्रह 52 - Sunuwar Bibleपरमप्रभु आ शिशी नु निसाफ कुम्सो पपाइक्ब कली। शेंतीक कुम्सो एदोमी दोएगमी सावल कली “दाऊद अहीमेलेक आ बाक्तीकेम ख्रुंइसाक्व” देंचा नोले ङा दाऊद आ कुम्सो। १सामुएल २२:९-१९ 1 गे थम बोल्यो मुर, मारदे मरिम्शो पचा आ पर्बम बोरनीनी? परमप्रभु आ शिशी नाक्त रे लीब। 2 गे नाक्त रे खतम सेल्चा आ पर्बम मिम्नीनी? इन शोव़ शेप्शो करद खोदेंशो बाक्ब। गे जोल पाइब ला बाक्नीनी। 3 गे रिम्शो पचा क्येङा मरिम्शो पचा ला दाक्नीनी। थमा लोव़ पचा क्येङा जोल पचा ला दाक्नीनी। ठेयब सेंदा पा। 4 गे जोल पाइब मुर, मारेइ मारेइ खतम सेल्तीक लोव़ ला दाक्नीनी। 5 परमप्रभुमी थमा पा इन कली गेना हना यो कली खतम सेल्ब। मेकोमी इन कली इन बाक्तीके रे कीशा, ग्रुंइब। मिनु मेकोमी इन कली ब्रोंइशा बाक्तीक रागी रे इन शाक्श सुन्दा उइश्शा, ताइक्ब। ठेयब सेंदा पा।। 6 ठीक पाइबपुकी मेको आन कली तशा, हिंनीम। मिनु मेकोपुकीमी रिश्शा कोव़शा भजन संग्रह ९१:८ 7 एको मुर कली कोव़ङीन। एकोमी परमप्रभु कली जिम्मा मगेंसे। आ शुश शोंपोम “गो मारेइ मारेइ पने चाप्नुङ देंशा, अरु आन कली खतम पोक्शा, बोल्यो दुम्त” दे रिश्शा, कोव़नीम। 8 तन्न गो परमप्रभु आ खिंमी गिग तेल रवा खोदेंशो बाक्नुङ। गो आं कली गेना हना यो दाक्ब परमप्रभु कली थमा सुइक्नुङ। भजन संग्रह ९२:१३-१६ 9 गो “इन पशो आ पर्बम गेना हना यो इन कली ठेयब सेल्नुङ। गो इन नें ‘पाप रे प्रोंइब बाक्ब’ दे आस पाइनुङ। मारदे हना इन नें रिम्शो बाक्ब। गो इन कली थमा सुइक्ब आन दातेमी ठेयब सेल्नुङ” देंती। |
© 2011, Wycliffe Bible Translators, Inc. All rights reserved.
Wycliffe Bible Translators, Inc.