भजन संग्रह 36 - Sunuwar Bibleपरमप्रभु आ रिम्शो पतीके कुम्सो पपाइक्ब कली परमप्रभु यावे आ गेय पाइब दाऊद आ कुम्सो। 1 परमप्रभु आ अरेशो मटीब आन थुंमी हेंथे पतीक लोव़ बाक्ब। मार लोव़ बाक्ब देंशा हना “मेकोपुकीम परमप्रभु कली मान पा महिंनीम” देंशो लोव़ बाक्ब। रोमी ३:१८ 2 मेकोपुकी ठेयब लेश्शा “आंइ मरिम्शो पशो गेनायो मतुंइसीब, गो दोस मताइनय” दे मिम्नीम। रोमी ३:१८ 3 मेको आन लोव़ मरिम्शो नु जोल ला बाक्ब। मेकोपुकीमी रुप्ब थुंम मिम्शा, रिम्शो पचा प्रोंइने थुम्शो बाक्नीम। 4 मेको आन ब्राख्येम बाक्मानु, आन मरिम्शो पतीक ला मिम्ना मिम्न बाक्नीम। मेको मरिम्शो लां खोइक्नीम। मेकोमी आन थुंमी “मरिम्शो पशो ग्रांग्रा दिशा मपाइनीकी” दे मदेंनीम। मीका २:१ 5 परमप्रभु यावे, इन गेना हना यो दाक्तीके सरीङ सम्म जाक्दीश्शो बाक्ब। इन दाक्शा मप्रोंइतीके गोस्स क्येङा इर बाक्ब। 6 इन ठीक पतीके ठेयब डांडापुकी खोदेंशो नु इन निसाफ पशो शुश लुक्च लशो समुन्द्र खोदेंशो बाक्ब। गे मुरपुकी, बी ब्यफ, क्यारश भेडा नु जन्तु आन कली कोव़शा, श्येत रे प्रोंइनीनी। 7 परमप्रभु, इन गेना हना यो दाक्तीक थम रिम्शो बाक्ब। मिनु मुरपुकी इन फ्रां आगाम फाम्सीनीम। 8 मेकोपुकी इन खिं ङा जचा तूचामी रूनीम। गे मेको आन कली इन ग्येरतीकेमी ग्येरपाइक्नीनी। 9 मारदे हना गे नु ब्रोंइतीके बाक्ब। मिनु गो इन छेङछेङमी हाम्सो ताइनीकी। येरमीया २:१३; यूहन्ना ४:१४ 10 इन गेना हना यो दाक्तीके इन कली तुइक्ब आन तार मोतीन। इन ठीक पतीके रिम्शो थुं पाइश्शो आन तार मोतीन। 11 मिनु ठेयब लेश्शो मुर आन खोइलीम आं कली मदिम्दीमील। इन अरेशो मटीबपुकीमी आं कली मखेरयीमील। 12 मरिम्शो पाइबपुकी गोल्शा, खतम दुम्शो बाक्नीम। मेकोपुकी बोक्ने मचाप्चा ङा पा गोल्शो बाक्नीम। |
© 2011, Wycliffe Bible Translators, Inc. All rights reserved.
Wycliffe Bible Translators, Inc.