भजन संग्रह 128 - Sunuwar Bible

परमप्रभु आ आसीक

लां ङा कुम्‍सो।

¹ परमप्रभु यावे कली मान पा हिंबपुकी आसीक तशो बाक्‍नीम। मेकोपुकी परमप्रभु यावे आ लांम गाक्‍शो बाक्‍नीम।

² गे इ पशो गेय रे जाइनेवे। गे ग्‍येरसीशा मारेइ मारेइमी दारनेवे।

³ मिनु इ मीश इ खिंमी सिश्‍शो अङगुर बोट खोदेंशो बाक्‍ब। इ आल इ खिंम तेल रवा आ कोच्‍वा दाप्‍शो खोदेंशो बाक्‍‍नीम। भजन संग्रह १२७:३

⁴ मोपा परमप्रभु यावे कली मान पा हिंब मुर आसीक ताइब।

⁵ परमप्रभु यावेमी इ कली सियोन रे आसीक गेब। गे मबेक्‍थु नाक्‍त किंत किंत यरूसलेममी रिम्‍शो दुम्‍शो ताइनेवे।

⁶ मिनु गे इ चच युइ आन कली ताइनेवे। इस्राएली आन थुं नाइश्‍शा बाक्‍मल। उत्‍पत्ती ४८:११; भजन संग्रह १२५:५