मर्कूस 2 - Sunuwar Bibleगुइ खोइली मदुक्ब कली सापाइश्शो मत्ती ९:१-८ ; लूका ५:१७-२६ ; यूहन्ना १:१९-२७ 1 नाक्त का निक्शी नोले कापेरनाउम लेम्माक्त। मिनु मुरपुकीमी “येसु खिंमी बाक्ब” दे तुइक्तमे बाक्त। 2 मिनु मेकेर शुश मुर खुम्सीशा, लाप्चोमी यो मुरपुकी देल्मा बाक्त। मिनु येसुमी मेको आन कली परमप्रभु यावे आ लोव़ शेंदीमी बाक्त। 3 मिनु ४ जना मुरपुकीमी गुइ खोइल मदुक्ब मुर का कुरशा चाक्ग्मे बाक्त। 4 शुश मुर देल्तीके येसु आ ङोंइती चाक्दीन्ने मचाप्मे बाक्त। मिनु खिं ङोइश्शा, फुल्लु याक्शा, ओंइतीके सेल्मे बाक्त। मिनु गुइ खोइल मदुक्ब कली कुरशो ब्राख्ये एर ओंथ डोरीम पाइश्शा, ओंखां पा येसु आ ङोंइती तोक्गमे बाक्त। 5 मिनु येसुमी मेको आन कली मो पशो तशा, थमा सुइय्यीमी बाक्त, दे तुइक्ता बाक्त। मिनु गुइ खोइली मदुक्ब कली “आं तौ, इ पाप क्याम्साक्व” देंमाक्त। 6 मेकेर सास्त्रीपुकी यो बाक्शो बाक्मा बाक्त। 7 मेकोपुकीमी येसु आ लोव़ नेंशा, आन थुंमी “दोदेंशो लोव़ पवा? परमप्रभु यावे कली शुक्शी पाइबाक्त। सुमी पाप क्याम्ने चाप्बा ङा?” दे मिम्तमे बाक्त। भजन संग्रह १३०:४; यसैया ४:३,२५ 8 मिनु येसुमी आन मिम्शो तुइश्शा, मेको आन कली “मारदे मोदेंशो मिम्तीनी? 9 गुइ खोइल मदुक्ब कली ‘इ पाप क्याम्साक्व’ देंचा देय ‘छुल बोक्शा, इ ब्राख्ये कुरशा, एर ओंथ हिरशा कोंइदो’ देंचा, तेको सक्ति कोंइतीक लोव़ बाक्बा? 10 रागीमी जरमेशोमी पाप क्याम्चा अधिकार तशो बाक्ब, दे गेपुकीमी यो तुइक्ताक्नी” देंमाक्त। मिनु गुइ खोइली मदुक्ब कली 11 “छुल बोक्शा, इ ब्राख्ये कुरशा, इ खिं लेतो” दे मदा बाक्त। 12 मिनु नेल्ल आन ङोंइती मेको बोक्शा, आ ब्राख्ये जो गुप्शा कुरशा, गाक्माक्त। मिनु नेल्लेमी छक लाक्शा “ओदेंशो छक लाक्चा ङा गेय मुल सम्म गेनायो मतशो नय” देंशा, परमप्रभु यावे कली ठेयब सेल्मे बाक्त। लेवी कली ब्रेश्शो मत्ती ९:९-१३ ; लूका ५:२७-३२ 13 मिनु येसु मेकेर रे लशा, लेंशा समुन्द्र आ नेक्था बाक्माक्त। मिनु मेकेर शुश मुर देल्मा बाक्त। मिनु येसुमी मेको आन कली शेंदीमी बाक्त। 14 मिनु मेकेर रे लशा, तिरो पोक्ब अल्फयस आ तौ लेवी कली तिरो पोक्तीकेमी बाक्शो तशा “आं नोले खोइय्यी” दे ब्रेत्ता बाक्त। मिनु मेको बोक्शा, आ नोले खोदा बाक्त। 15 मिनु लेवी आ खिंमी जना जन बाक्मानु, तिरो पोक्ब नु पापी शुश नु काथा जामे बाक्त। मारदे हना शुशेमी येसु आ नोले खोदमे बाक्त। 16 मिनु फरिसी आन दाते ङा सास्त्रीपुकीमी येसु कली पापी नु तिरो पोक्बपुकी नु काथा बाक्शा जशो तशा, येसु आ शेंसीब आन कली “मारदे तिरो पोक्बपुकी, पापीपुकी नु काथा बाक्शा जाइबा?” देंमा बाक्त। 17 मिनु येसुमी मेको आन लोव़ नेंशा, मो देंब आन कली “रोइ मपशो मुर डाक्टर ममाल्नीम। रोइ पशो मुर ला डाक्टर माल्नीम। ठीक पाइब कली ममाइ, पापी आन कली ब्रेत्थ जाक्शो नङ” दे माइक्मी बाक्त। माइजा बाक्चा मत्ती ९:१४-१७ ; लूका ५:३३-३८ 18 यूहन्ना आ शेंसीबपुकी नु फरिसीपुकी माइजा बाक्बाक्मा बाक्त। मिनु मुरपुकीमी येसु आ नेक्था जाक्शा “यूहन्ना आ शेंसीबपुकी नु फरिसी आन शेंसीबपुकी माइजा बाक्नीम। इन शेंसीबपुकी चहिं माइजा मबाक्नीम। मारदे मो पशो नमी?” दे हिल्लो पामे बाक्त।फरिसी रिती थिती सेल्शा, रिम्शो पचा कली कोव़ब यो बाक्शो बाक्तेक्म। 19 मिनु मोदें हिल्लो पाइब आन कली येसुमी “जन्तीपुकी ग्युम्ले नु बाक्मानु, माइजा बाक्ने मचाप्नीम। 20 काबु चहिं ग्युम्ले नु फ्राचा पुंइसीनीम। मिनु माइजा बाक्नीम। 21 सुइमी माइत वामी नक वा क्येप्शा मफेरनीम। फेरतेक्म हना, नक वा चुप्शा, माइत वा कली खाक्शा, ङोंइती ङा गाक्शो क्येङा ठेयब सेल्ब। मारदे हना माइत नु नक मगारब। 22 सुइमी माइत कुशुल के थैलोमी नक अङगुर शांबु कुर मपाइनीम। कुर पाम्तेक्म हना, नक अङगुर शांबु बोरशा, थैलो खाक्शा क्युप्ब। थैलो यो गाक्ब। नक शांबु नक थैलोमी ला गारब” दे शेंदीमी बाक्त। नाइक्तीक नाक्त आ पर्बम लोव़ मत्ती १२:१-८ ; लूका ६:१-५ 23 मिनु काबु नाइक्तीक नाक्त येसु नु आ शेंसीबपुकी चेरब रू लां गाक्मा बाक्त। मिनु गाक्मानु, शेंसीबपुकीमी चेरब बाला शोइक्चा गोव़मे बाक्त। 24 मिनु फरिसीपुकीमी येसु कली “कोव़ङीन, नाइक्तीक नाक्तीमी पचा मदुम्ब गेय मारदे पाइनीमी?” दे मदमे बाक्त। 25 मिनु येसुमी “दाऊद नु आ वारचपुकी शोव़लु बेक्मानु, दाऊदमी मार पवा, मेको ब्रेक्शो लोव़ गेनायो मपढेनी? 26 ठेयब चढ़ेब अबीयाथार आ पालामी दाऊद परमप्रभु यावे आ खिं ओव़शा, परमप्रभु यावे कली चढ़ेशो शोब्ले शोल्शा जशा, आ वारच आन कली यो जचा गेवा बाक्त, दे मपढेनी? मेको शोब्ले चढ़ेबपुकीमी ला जाइबाक्मा बाक्त। अर्को मुरपुकीमी जचा मदुम्ब बाक्माक्त। १सामुएल २१:७; लेवी २४:९ 27 नाइक्तीक नाक्त मुर आन कली वोइश्शो बाक्ब। मुरपुकी नाइक्तीक नाक्त कली ममाइ। प्रस्थान २०:१० 28 मोपतीके रागीम जरमेशो दा नाइक्तीक नाक्त मार पचा, मार मपचा मेको अधिकार पाइब बाक्ब” दे शेंदीमी बाक्त। |
© 2011, Wycliffe Bible Translators, Inc. All rights reserved.
Wycliffe Bible Translators, Inc.