मत्ती 13 - Sunuwar Bibleवांचेर शोक्शो कथा मर्कूस ४:१-९ ; लूका ८:४-८ 1 मेको नाक्त येसु खिं रे गाक्शा, समुन्द्र आ नेक्था लशा निस्साक्व। 2 मिनु शुश मुर जाक्शा देल्तेक्म। मिनु येसुमी शुश मुर आन कली देल्शो तशा, डोंगा ङोइश्शा निस्साक्व। मुरपुकी चहिं समुन्द्र आ नेक्था बाक्तेक्म। 3 मिनु कथा सेल्शा, शुश लोव़ शेंताक्मी। कथा का ओं देंत “मुर कामी वांचेर शोक्थ लमाक्त। 4 मिनु ब्वारानु, गेडा का निक्शी लांमी जुक्तमे बाक्त। मिनु चिक्बीम गुप्शा जामे बाक्त। 5 का निक्शी ग्याङग्रो ठाउंमी जुक्तमे बाक्त। मिनु शुश खप मबाक्तीके जिव जाव वामा बाक्त। 6 तन्न नां पवानु, सोल सुल बेक्मा बाक्त। मारदे हना शाक्श मपाइश्शो बाक्मा बाक्त। 7 का निक्शी चू घारीमी जुक्तमे बाक्त। मिनु चूम सुम्शा, वाचा मगेवा बाक्त। 8 मिनु का निक्शी रिम्शो खपीम जुक्तमे बाक्त। मिनु वाशा शुश ग्रेल्शा, गेडा का के सहे का, ६०, ३० सिम्मा बाक्त। 9 सु नोफा पाइश्शो बाक्मे, मेकोमी नेंनल” देंत। कथा सेल्शा शेंशो आ पर्बम मर्कूस ४:१०-१२ ; लूका ८:९-१० 10 मिनु शेंसीबपुकीमी येसु कली “मारदे कथा सेल्शा, मुर आन कली शेंनीनी?” दे हिल्लो पाम्तेक्म। 11 मिनु येसुमी “इन कली स्वर्ग ङा राज्य आ पर्बम ख्रुइश्शो लोव़ रुप्तीक थुं गेशो बाक्त। तन्न मेको आन कली मगेमी बाक्त। १कोरिन्थी २:१० 12 थीबमी तेम्शा गेचा पुंइसीब, मिनु शुश दुम्ब। मथीब चहिं बाक्शो यो रोइक्चा पुंइसीब। हितोपदेस ९:९; मत्ती २५:२८-२९; मर्कूस ४:२४; लूका ८:१८ 13 कथा सेल्शा शेंनुङमी। मारदे हना कोव़शा यो मताइनीम। नेंशा यो मरुप्नीम। यूहन्ना १६:२५; ब्यवस्था २९:३ 14 साइ नेसी यसैयामी देंशो नोले दुम्ब लोव़ मुल थमा दुम्त। मार ब्रेक्शो बाक्त देंशा हना ‘नेंचा दा नेंनीनी, तन्न दोपा यो मरुप्नीनी। कोव़चा दा कोव़नीनी, तन्न दोपा यो मताइनीनी। 15 मेको मुर आन थुं ग्याम्शो बाक्नीम। आन नोफा थांइशो बाक्नीम। आन मिक्च क्रिप्शो बाक्नीम। मोदेंशो मपशो नम हना, आन मिक्चीम ताम वा, नोफाम नेंनेम वा, थुंमी रुबेम वा, मिनु आं गे लेम्म वा, मिनु गो सापदुमी वा’ दे ब्रेक्शो बाक्त। यसैया ६:९-१०; यूहन्ना ९:३९ 16 गेपुकी चहिं ग्येरसीने। इन मिक्च नु नोफा मेको आन के खोदेंशो ममाइ। मिक्चीम ताइनीनी, नोफाम नेंनीनी। लूका १०:२३-२४ 17 नोफा दाइश्शा नेनीने, गेमी मुल तशो नेंशो साइ नेसी रे परमप्रभु यावे आ लोव़ पाइबपुकीमी तचा नेंचा दाक्बाक्मा बाक्त। तन्न तचा नेंचा मतामे बाक्त। १पत्रुस १:१० वांचेर शोक्शो कथा आ अर्थ शेंशो मर्कूस ४:१३-२० ; लूका ८:११-१५ 18 वांचेर ब्वारशो कथा आ अर्थ शेंनन्नी, 19 सुमी परमप्रभु यावे आ राज्य ङा लोव़ नेंशा मरुबा, मेको लांमी जुक्शो वांचेर खोदेंशो बाक्ब। सैतानमी आ रुप्शो क्याम्शा गेब। 20 ग्याङग्रो खपीम शोक्शो खोदेंशो बाक्त हना, देंशो चोटी बिश्शा ग्येरसीब। 21 तन्न शाक्श थोक्चा मतथु शुश मलीब। परमप्रभु यावे आ लोव़ आ पर्बम श्येत जाप्तु हना, थु प्रोंइशा गाक्ब। 22 चू घारीम जुक्शा सुम्शो खोदेंशो बाक्त हना, लोव़ नेंब। तन्न दोपा ठेयब दुम्नुङा? दोपा क्येट चेमु? दे मिम्शा, आ थमा सुइक्तीके देक्ब। मिनु नेंशो लोव़मी फल मसिप्ब। मत्ती ६:१९-३४; १तिमोथी ६:९ 23 सुमी नेंशा रुप्बा, मेको चहिं रिम्शो खपीम जुक्शो वांचेर खोदेंशो शुश ग्रेल्शा, गेडा का के सहे का, ६०, ३० सम्म सिप्ब” दे शेंताक्मी। सुवा नु चेरब शोक्शो कथा 24 मिनु अर्को कथा ओदें शेंताक्मी “स्वर्ग ङा राज्य ओदेंशो बाक्ब, मुर कामी आ रूमी रिम्शो वांचेर शोक्गा बाक्त। 25 मिनु नाक्दो इम्मेनु, आ जोरी सत्रुमी मेको तारी सुवा ब्वारशा गेवा बाक्त। 26 मिनु वांचेर वामेनु, सुवा यो वामाक्त। 27 मिनु गेय पाइबपुकीमी सुवा वाशो तशा, रू आ धनी कली ‘रिम्शो वांचेर शोक्नी ममाइ? मिनु सुवा दोपा वामा?’ देंमा बाक्त। 28 मिनु रू धनीमी ‘आं जोरी सत्रुमी ब्वारा बाक्त’ देंमाक्त। ‘मो हना मेको सुवा तुल्शा ताइक्तका? मार देंनीनी?’ देंमानु 29 ‘तुल्चा मदुम्ब। सुवा तुल्तीनी हना, चेरब यो दुल्ब। 30 मोपतीके रिक्ची मजाक्म सम्म बाक्ल। रुप्ची जाक्मेनु, आं गेय पाइब आन कली ङोंइती सुवा रिक्शा फ्रेंशा चोचा कली तिल्शा वोतीने। मिनु चेरब रिक्शा तुप्शा आं भकारीम कुर पा वोतीने, दे माइक्नुङमी’ देंमाक्त” दे शेंताक्मी। मत्ती ३:१२; मत्ती १५:३; प्रकाश १४:१५ तोरी शोक्शो कथा मर्कूस ४:३०-३२ ; लूका १३:१८-१९ 31 येसुमी “स्वर्ग ङा राज्य ओदेंशो यो बाक्ब, मुर कामी आ रूमी तोरी शोक्गा बाक्त। 32 वांचेर नेल्ल क्येङा आइक्च गेडा तोरी गेडा बाक्माक्त हना यो, वाशा ठेयब रवा दुम्माक्त। मेको रवामी चिक्बीम ग्योव़ सेल्शा बाक्मा बाक्त” दे अर्को कथा का शेंताक्मी। बोरपाइक्ब ओख्ती कथा 33 मिनु येसुमी “स्वर्ग ङा राज्य ओदेंशो बाक्ब, मीश मुर कामी पाथी सां फसमी बोरपाइक्ब ओख्ती सुप्शा, फस नेल्ल मबोरम सम्म सुम्शा वोदा बाक्त” दे अर्को कथा का शेंताक्मी। लूका १३:२०-२१ 34 येसुमी मेको लोव़ नेल्ल कथा सेल्शा शेंताक्मी। कथा मसेल्थु मारेइ लोव़ मशेंदीमी। मर्कूस ४:३३-३४ 35 मारदे हना साइ नेसी परमप्रभु यावे आ लोव़ पाइबमी देंशो लोव़ मुल थमा दुम्ल, दे कथा रे पा शेंताक्मी। मेको साइ ब्रेक्शो लोव़ चहिं मार बाक्ब देंशा हना “सरीङ नु रागी सेल्शो रे मुल सम्म ख्रुइश्शो लोव़ कथा सेल्शा नेंपाइक्नुङमी” दे ब्रेक्शो बाक्त। भजन संग्रह ७८:२ चेरब शोक्शो कथा आ अर्थ शेंशो 36 मिनु येसु मुर आन कली प्रोंइशा, खिं लेत्त। मिनु आ शेंसीबपुकीमी “रूमी वाशो सुवा आ कथा आ अर्थ शेंदीकी” देंतेक्म। 37 मिनु येसुमी “रिम्शो वांचेर शोक्ब देंशो रागीम जरमेशो बाक्ब। 38 रू देंशो रागी बाक्ब। रिम्शो वांचेर देंशो राज्य ङा सन्तान नमी। सुवा देंशो सैतान आ सन्तान नम। १कोरिन्थी ३:९; यूहन्ना ८:४४ 39 सुवा ब्वारब सैतान बाक्ब। रुप्ची नाक्त चहिं निसाफ पची नाक्त बाक्ब। गेय पाइबपुकी परमप्रभु यावे आ गेय पाइब नम। 40 सुवा खुप्शा, मीम चोशो खोदेंशो पा निसाफ पची नाक्त मार दुम्ब देंशा हना, मोदेंशोन दुम्ब। 41 रागीम जरमेशोमी परमप्रभु यावे आ गेय पाइब आन कली सोइक्ब। मिनु मेकोपुकीमी आ राज्य रे पाप पपाइक्ब नु पाप पाइब नेल्ल आन कली खुप्शा, मत्ती २४:३१ 42 ठेयब मीम हुम्नीम। मेकेर मुरपुकी आन ख्रुइ शेप्शा ङाक्नीम। 43 परमप्रभु यावे आ ङोंइती ठीक दुम्शोपुकी चहिं आं आफ आ राज्यमी नां खोदेंशो छेङछेङम ग्येरशा बाक्चा ताइनीम। सु नोफा पाइश्शो बाक्मे, मेकोमी नेंनल। दानीएल १२:३ रूमी थिम्शो शोंप 44 स्वर्ग ङा राज्य ओदेंशो यो बाक्ब, रू कामी शोंप थिम्शा वोइश्शो बाक्माक्त। मिनु काबु मुर कामी मेको शोंप थिदा बाक्त। मिनु थम ग्येरसीशा, लेंशा थिम्शा वोइश्शा, आइक्के बाक्शो नेल्ल लेश्शा, मेको रू ग्यबा बाक्त। मत्ती १९:२९; लूका १४:३३; फिलिप्पी ३:७ शुश क्येट लाइब मोती 45 स्वर्ग ङा राज्य ओदेंशो यो बाक्ब, मोती ग्याप्ब लेयब कामी रिम्शो मोती ग्याप्नुङ, दे मिम्शा, माल्ना माल्न गाक्माक्त। 46 मिनु काबु शुश क्येट लाइब मोती तवा बाक्त। मिनु आइक्के बाक्शो नेल्ल लेयशा, मेको ग्यबा बाक्त। ङांइ रेश्शो कथा 47 स्वर्ग ङा राज्य ओदेंशो यो बाक्ब, समुन्द्रमी ङांइ रेत्चा कली ग्याइल आप्शो बाक्माक्त। मेको आप्शो ग्याइलीम शुश थरी ङा ङांइ ओव़मा बाक्त। मत्ती २२:९-१० 48 मिनु ब्रीमेनु, माझीपुकीम ग्याइल कीशा समुन्द्र रे ग्रुंइदमे बाक्त। ग्रुंइशा ब्वचा ङा ङांइ वोदमे बाक्त, मब्वचा ङा ङांइ ताइक्तमे बाक्त। 49 निसाफ पची नाक्त मोदेंशोन दुम्ब। परमप्रभु यावे आ गेय पाइबपुकी जाक्शा, ठीक पाइब आन दाते रे पापी आन कली योव़शा ग्रुंइशा, मत्ती २५:३२ 50 ठेयब मीम हुम्नीम। मेकेर मुरपुकी आन ख्रुइ शेप्शा ङाक्नीम। 51 आं शेंतीक लोव़ नेल्ल रुम्नी?” दे हिल्लो पवानु “रुप्तक” देंतेक्म। 52 मिनु येसुमी “स्वर्ग ङा राज्य आ पर्बम शेंसीशो जोक्ब तुइक्ब दुम्शो मुर खिं ङा होव़प खोदेंशो बाक्ब। मेकोमी आ भकारी रे माइत नु नक थोव़क शोल्ने चाप्ब” देंत। नासरथ सहरम येसु कली मब्रशो मर्कूस ६:१-६ ; लूका ४:१६-३० 53 मिनु येसुमी मेको लोव़ शेंने थुम्शा, मेकेर रे लत। 54 मिनु लशा, आ बाक्शो सहरम जाक्दीश्शा, ग्रुम्तीक खिंमी शेंताक्व। शेंदानु, आ लोव़ नेंबपुकीमी छक लाक्शा “आमाइ, एकोमी ओदेंशो लोव़ दोपा जोक्गा? सु आ सक्तिमी छक लाक्चा ङा गेय पवा? 55 शी के सेल्ब आ तौ ममाइ ङा? आ ममा मरीयम ममाइ ङा? आ लोक्ब याकूब, योसेफ, सिमोन, यहूदा मनमी ङा? 56 आ समीपुकी गोपुकी नु बाक्ब मनमी ङा? मिनु मोदेंशो आन तौमी दोपा जोक्शा ठेयब दुम्मे?” दे आन थुं मनुशो लोव़ पमुमा बाक्त। यूहन्ना ६:४२; यूहन्ना ७:१५,५२ 57 मिनु येसुमी मेको आन थुं मनुशो तुइश्शा, मेको आन कली “तेइ तेइ परमप्रभु यावे आ लोव़ पाइब आन कली ठेयब सुइश्शा मान पाइनीम। आंम रागी, आंम खिंमी चहिं महिक्नीम” दे माइक्तीमी। यूहन्ना ४:४४ 58 मेकेर छक लाक्चा ङा गेय का निक्शी ला पाप्तु। मारदे हना मेकोपुकीमी थमा मसुदेम। |
© 2011, Wycliffe Bible Translators, Inc. All rights reserved.
Wycliffe Bible Translators, Inc.