१ यूहन्ना 1 - Sunuwar Bibleथमा सुइक्ब आन कली ठेयब शेंतीके 1 नेल्ल क्येङा ङोंइती रे बाक्शो, सु बाक्त देंशा हना, ब्रोंइचा गेब लोव़ माइश्शो बाक्त। गोपुकीमी मेको आ लोव़ नेंतक। आंइ मिक्चीमी ताइतक। आंइ मिक्चीमी कोव़तक। आंइ गुइमी थीतक। यूहन्ना १:१; यूहन्ना १:१४; यूहन्ना १:४ 2 मेको ब्रोंइचा गेब लोव़ माइश्शो रागीमी तपांइसीचा पुंइसाक्व। मिनु गो मेको कली ताइतक। मोपतीके गोपुकीमी मेको आ लोव़ शेंनीकी। मिनु इन कली यो गेना हना यो, इं आफ नु बाक्चा आ पर्बम शेंनीकी। मेको गेना हना यो ब्रोंइशा बाक्तीक माइश्शो ङोंइती आ आफ परमप्रभु यावे नु बाक्त। मिनु परमप्रभुमी मेको आंइ कली कोंइताक्व। 3 मिनु आंइ तशो नु नेंशो इन कली शेंनीकी। मारदे हना गो नेल्ल थुं का ङा दुम्यल। मिनु गो नेल्ल इं आफ परमप्रभु यावे नु आ तौ येसु ख्रीस्त नु थुं का ङा बाक्नय। 4 गो नेल्ल इं थुं ग्येरसीशा बाक्य, दे एको चिठी ब्रेक्शा, इन कली सोइक्ताक्क। १यूहन्ना ५:१३; यूहन्ना १५:११; यूहन्ना १६:२४ परमप्रभु छेङछेङ बाक्ब 5 मेकोमी आंइ कली नेंपाइश्शो लोव़ इन कली शेंनीकी। मार लोव़ शेंनीकी देंशा हना, परमप्रभु यावे छेङछेङ बाक्ब। मिनु मेको नु छिङछिङ काइ मबाक्ब। याकूब १:१७ 6 गोपुकीमी छिङछिङम गाक्शा यो “परमप्रभु यावे नु थुं का ङा बाक्नय” देंतय हना, जोल्फे दुम्नय। थमा गेय मपाइनय। १यूहन्ना २:४ 7 मेको छेङछेङमी बाक्शो खोदेंशो पा, गो छेङछेङमी गाक्तय हना, अर्को थमा सुइक्बपुकी नु थुं का ङा दुम्नय। मिनु आ तौ येसु आ हुशेमी इं मरिम्शो पशो नेल्ल क्याम्ब। हिब्रू ९:१४; प्रकाश १:५ 8 गोपुकीमी “मरिम्शो काइ मपक” देंतय हना, इं आंमा मिक्च सिल्शो बाक्नय। इं थुं आगामी थमा मबाक्ब। 9 गोपुकीमी “मरिम्शो पाइतक” देंतय हना, इं मरिम्शो पतीके क्याम्शा, इं कली शेक्ब। मारदे हना मेको आ देंशो पाइब नु ठीक पाइब बाक्ब। भजन संग्रह ३२:३-५; हितोपदेस २८:१३ 10 गोपुकीमी “मरिम्शो काइ मपक” देंतय हना, मेको कली जोल्फे सेल्नय। मिनु आ देंशो लोव़ इं थुंमी मलीब। रोमी ३:१०-१८ |
© 2011, Wycliffe Bible Translators, Inc. All rights reserved.
Wycliffe Bible Translators, Inc.