Dadaba Yonasi 2 - Suri Latin

Lɔga Allinɛnɛa Yonas ko Tumu

¹ Na huna iho urgusiyɔ kɛngɔye, ogolu Komoruya nɛnɛ Tumu

² na sɛɛsɛ, “Tumuye, hunaa wa kihi chɔllaɔ, anna kelienyo na shigonyo na yagaganyo lɔgɔ bhɛa chɔɔ karɛi wuy logɔ tugɔ.

³ Na ujjugaganyo bhɛa bo hɔra na kɛtɛwa surr yirisiyɔ toye bhɛa uturronɛa ma na ma toya bhɔ.

⁴ Na hɛ ko anna kègendɛa dhul. Nɔ dha ale kori doraa nunu barara sɛgɛn.

⁵ Na gɔytany ma na ngani ngakoronyo. Na chɛbtany dagalinyaa ɛlla yirisiyɔ dhis dhis.

⁶ Na kɔgɔyɛu surr kutulɔ sugumɔ bhɛa kɔbɔnga ngakobhonsanɛayo dhul. Na nɔng Komoruya nanu Tumu inye obhonisionyɔ logɔ tugɔ na kabawa.

⁷ Na hunaa ketewa rɛsiye, kagadhainyɔ inye na kogolinyɔ. Na lɔga ganyu ago surr doraa nunu barara na shigonyo.

⁸ Zukte ibhbhɛ aha gena ke barariye dha dhɔttɛ chaldina nunu bo challa seni aynɛ.

⁹ Nɔng anye keterisanniny inye na kudulaginy go na kurrugɛsɛn lɔga bɔɔ kibhiikko ko inye. Hira ibbaysi zugo ani ꞉inyo sɔng.”

¹⁰ Na nɔng tumu aynɛ urgusi lɔgɔ na koo taharɛsɛ Yonas yirisi tugɔ bhɛa dhɔrɔgɔsa.