YEKIKITHI AKINIU 31 - BAIBEL (BSI)

Hezekiya wu Shikikithe

¹ Aghulhu pinyi tave kethiu, Israilmi kumtsu Juda lo aphughi akeqolo wu eno atu tsukucho hethawo, Ashera lhouliu lau ikhiphetsu puakeu julhoqo hephowo eno ayeh kumtha chine kumlla ngo akiptiaqo kutsalewo ke. Panonguno Juda lo aqha kumtsu lo ngo Benjamin, Efraim eno Manase ghakhuqo lo ghi tipatho shiwoke; tithiuno panonguno pututa phulo wove.

² Akukau Hezekiya no achinemi ngo Levimi muqo akikithi shi qhiwo eno tishi keu lono pututa shelo akumla shikepu ake. Akumla tipaqoye akipti kumllagho eno kuposhukulu kumllagho pesu mlla keu, achinekilo akumlla hoholo akumlapu saje shikeu eno Achineki lo pututa muzulo akishe eno shikimthi tsukeu.

³ Inakijili pa tsuaqu loji lono akipti kumllagho ghenguno Hezekiya no lhoxu kuto tsu cheke eno itaghi Sabat lo ngo Aqhi Kithe pine eno apine kutauqolo AMPEU Yezah lono mlla kepu avehupu shi akeu ghi pano tsucheke.

⁴ Tinguno alauno, akukauno Jerusalem lo timiqo vilo pipuzu achinemi ngo Levimino ithukulupu shi akeu kumllagho ghi sughi penikeu shike, tishianguno panonguye AMPEU Yezah lo shilo pi puakeu lono ado kumtsu tsulu apeni yeke.

⁵ Akukau no ahza tsuve kemtsa Israilmino panoqo wu agho hipaqo sughi: athi kivi, atsayi ji, oliv teli, akhingozu eno alulo kutau ipeghi keqo eno panonguno kiu akeno tipaqo thwokha lo chighi saje lakhi ghi pesu ighike.

⁶ Juda lo aphughilo kughuna chekemi kumtsuno panoqo wu amshi ngo bheri akeu lono chighi saje lakhi sughi eno panongu no agho kutomo sughike, tipau pesu panongu no AMPEU lau akimthe ikhiphe tsukeu.

⁷ Aghoqo huye aqhi akuthuu lono ighi thuve eno tishi ighikibe ghi aqhi bidi kutolo pekumqo acheke.

⁸ Akukau Hezekiya ngo pawu kijemino timiqono agho kumzapu tsukeu ithulu keulo panonguno AMPEU sheqhe.

⁹ Akukau no agho tipaqo ghenguno achinemi ngo Levimi putsake,

¹⁰ ikelo Achinetou Azaria, Zadok polo kughukomi lakhi no pa vilo ishi pi, “Timiqono Achineki lo panoqo gho sughi keu huthuve ake ghenguno chukumkha ithulu ani eno achili ghi kutomo shilu ani. Ninguye hipaqo kumtsu alupekeu ye AMPEU no pawu timiqo kumghatsu keu ghenguno ke.”

¹¹ Akukau zah kutsu lono panonguno Achineki bocho lo pekutsu kepu chebo kuto

¹² eno puhapighiyive pemo nike ghenguno agho ngo chighi saje lakhi kumtsu tilehi qhi. Panonguno Konania ipikeu Levimi lakhi pelo tipau shou ampi shipe eno pa thikuzuu Shimei no pa kukuphuu shipe.

¹³ Levimi chighi pelo pama qholo mla penike kughutsu, panoqo ye - Jehiel, Azazia, Nahat, Asahel, Jerimot, Jozabad, Eliel, Ismakhia, Mahat eno Benaya. Hipaqo kumtsu Akukau Hezekiya ngo Achinetou Azaria pamano mijetsu keu kuka qholono shike.

¹⁴ Levimi Imna nu Kore no Achineki Kipelau Khagho lo Ghukhemi atou shiche keuno AMPEU lau agho sughi keu ikhilutsuni keulo eno kije pesu tsuni keulo ampi shike.

¹⁵ Aphughi kutau khilehi achinemi ache keno Levimi kutamiqono amikucho shi tipau kuphutsu cheke, tipaqoye: Eden, Miniamin, Jeshua, Shemaia, Amaria eno Shekania. Panonguno achuqupu pesu pano kusami Levimi lau pututa kumlapu saje kiqi lono aqhemishi kije tsu che,

¹⁶ eno tiye alagha kiqi lono shimoe. Panonguno kiptimi ampe shighi shive kemi eno tinguno kichimi shivekemi khunoqono Achineki lo tsalakipe kumla makho puche keno pututano akumla shi akeu qhemi lono kumtsu asaje tsuke.

¹⁷ Achinemiqo ye alagha kiqi lono akumlapu kuphatsu eno Levimi ampe muku shivekemi momu tinguno kichimi shivekeqo ye akumla saje kiqi lono panoqo kumla kuphatsu che.

¹⁸ Panongu kumtsu panongu nipu anuli eno kutami kulhokughomi kuqhano aje yesupe qhike kughengu panonguye kugho kughomu panoqono akimthepu kumla shikepu shikelo panonguye kuto pesu aghi pemoaye sacheke.

¹⁹ Achinemi khunongu no Aron laghami ghenguno kutotsu keu phughi lo aghikemi keno momu tipaqo phughilo atsuni kumzapu yeghi lo aghikemi keno tipaqoye tilau achinemi kibolomi kiptimiqo eno Levi laghami kikihi gholo aje aghikemi kumtsu lau achuqupu kijetsu penike amakho kupumi qhike.

²⁰ Juda ghakhuqha lo, Akukau Hezekiya no kiuno achipiu eno kiuno AMPEU pa Lhou pulou keno tipau shike.

²¹ Paye tokulu shiluke kughengu pano Achineki ghenguno shi keu momu ayezah pelukeu kumtsulo paye pa Lhou lau amlo tsushekeu eno qhoi qhoqhulu keu kukumsu xapu puzu shicheke.