YEKIKITHI AKINIU 29 - BAIBEL (BSI)

Juda lo Akukau Hezekiya

¹ Hezekiya no ampe muku pungu shi ake lono Juda lo akukau shilu eno paye Jerusalem lono ampe muku toku ayeh pelu. Pazaye Zekharia nga Abija ke.

² Pasu Akukau David no xupiye keu pape ghi pano AMPEU lopu kiu keno tipau shike.

Achineki Shikimthe

³ Hezekiya no akukau shiluke mpe aqhi atughiu lo pano Achineki khaghoqo khaqhi kithethu shi eno pano tipaqo pukhokithe vepe.

⁴ Pano achinemi ngo Levimi aqo lakhi sawo Achineki khala kipela kudau kumqolu

⁵ eno tilauno panoqo putsa. Pano pi, “Nongu Levimi ye nolikhi nongu ikhiphe pe akimthepu shive puzu ningu puasu Lhou AMPEU Achine ki shikimthelo. Achineki lo kitiqeve kepu jeli kumtsu ikhi phevelo.

⁶ Ningu puasu ye AMPEU ningu Lhou lau pukhukulu shimove ke eno pa mlo qimo kepu kiu keno tipau shiuve ke. Panonguno pa qhive eno pano khilehi ngo cheni keno ti kudau azupo kugho puwove ke.

⁷ Panonguno Achineki hukikha khave, akulu inhevepe eno tsungqui ta ngo piti mlla keu gho pesu Israil Lhou Achine ki lo pitimove ke.

⁸ Hi ghenguno AMPEU ye Juda ngo Jerusalem lau aloghu ideve ke eno pano tipanoqo lau kiu shive keno tipauno timi kumtsu shithughuive ke. Nonguno hipau tsaqui ithi anike.

⁹ Ningu papunoqo ye aghushi lono thive, ningu nipu nuli ye akughumi shi sawuve.

¹⁰ “Itehiye AMPEU, Israil Lhou sasu puloshoqhi lakhi shinikeu ino xathaluvae, tishi anguno paye nilau aloghu ide kithe pemonike.

¹¹ Inuliqo, ado adou lono puwove kevilo. Tsungqui ta piti peni keu shi AMPEU no kishelu keuye nongu ke eno timiqo saphe pesu pa mllapeni keqoye nongu ke.”

^12-14 Levimi hipaqo tilehi ake: Kohat lono Amasai nu Mahat ngo Azaria nu Joyil; Merari lagha lono Abdi nu Kish ngo Jehalel nu Azaria;Gershon lagha lono Zimna nu Joa ngo Joa nu Eden; Elizafan lono Shimri ngo Jeuel; Asap lagha lono Zekharia ngo Matania; Heman lagha lono Jehuel ngo Shimei; Jeduthun lagha lono Shemaia ngo Uziel.

¹⁵ Timi hipaqono pano kusami Levimi hekutsu kumqo eno panongu likhi panongu pesu achinepulo akimthe shiluve. Tithiu akukauno panoqo lau ahza tsuke toi panonguno AMPEU Yezah kiqi lono Achineki pesu achinepulo akimthe shiluke.

¹⁶ Achinemiqo shikimtheni ke Achineki alou ilove eno panongu no achinepu lo mithemo kepu jeli kumtsu achineki khalalo pesu ipeghive. Tilauno Levimino tipaqo pesu aphughi lono ashou Kidron Khila lo pewuve.

¹⁷ Akumlaye aqhi atughiu atsala atughiu lono huthuve eno atsala akutacheu loye panonguno kumtsu shi khave, tipau shikeu gholo Achineki lo iloche keu chebo ghi shikimtheve ke. Tithiu panonguno itaghi atsala tache mlalu, tiye tipaqhi atsala chighi akutsughou kutolo shike, Achineki lo mllani kepu shi kutokupui mla ake.

Achineki Ikhiphetsu Kithe

¹⁸ Levimino asutsa hipau pesu Akukau Hezekiya lau tsuke: “Ninguye Achineki kumtsu achinepulo shikimthe keu shikhavae, tiye piti mllakeu kiptia, akimthe sho kibepu eno peitha kepu nhemgha kumtsu shivae.

¹⁹ Ninguno Akukau Ahaz no pano Alhou lau amikucho shimoke mpe ghuloki lono peitha kepu nhemgha suwuve keqo kumtsu suchile sughivae eno ninguno tipaqo ikhiphepe akimthe shikithevae. Tipaqo kumtsu AMPEU wu akiptia gizulo akhani ke.”

²⁰ Kumnuvemo puzu Akukau Hezekiya no aphughilo sakiphemi atomi kumtsu kukumqo eno panongu kumtsa Achinekilo wuke.

²¹ Akukau kibolomi ngo Juda lo akemiqo xine ikhisuwuve nike eno Achineki shikimthe nike ghenguno panonguno amshitsu tsuni, bheri tsuni, bheriti tsuni eno ane tsuni pesu akumllagho shinike luve. Akukauno Aron polo kughukomi achinemi vilo lhoxuqo pesu akiptia lono aghakishi shi ghi mllalo pike.

²² Achinemino amshitsu paghi heqhi, tithiuno bheri eno tithiuno bheritiqo heqhi eno hipaqo ghakishi ji pesu akiptia shou kuzute pukuke.

²³ Ashekhalo panonguno aneqo sasu akukau ngo mlla akemi lau wu eno panoqono au pesu tipaqo shou beke.

²⁴ Tithiu achinemi no aneqo heqhi eno tipaqo ji pesu akiptia shou lepuku tiye timi kumtsu xine ikhisuwuve tsuniyeke, kughengu akukauno ahza tsukeuno Israilmi kumtsu ghenguno akipti kumllagho ngo axine kumllagho shilo pike.

²⁵ AMPEU no Akukau David wu tungkupu Gad ngo tungkupu Nathan vechewo David lau akukutsu tsa tsupua keu kiqi lono Hezekiya no shike; pano Achineki lo Levimi pelo akighi lebo ngo alazayi

²⁶ ti Akukau David no pepimhe chekeu leboqo pesu ngope. Achinemi ghi afuko pesu tilehi puthugho.

²⁷ Akipti kumllagho tsupe nike Hezekiya no ahza tsuve eno akumllagho pitithu kemtsa timiqono AMPEU sheqhe alephe eno alekiphemino afuko ngo kutau lebo kumtsu kuigha thuve.

²⁸ Tilehi akemi kumtsuno akumlla hoholo sukuqhano alekiphe ngo alebo kuigha keqo ye aghakishi piti tamoke kutolo tishi shi ake.

²⁹ tithiuno akukau Hezekiya ngo timi kumtsu qhoqhunhe no Alhou mlla.

³⁰ Akukau ngo pano shiyeh lo sakiphemino Levimi vilo David ngo tungkupu Asap pamano sheqhe keu le yepe puakeu phe pesu AMPEU shipililo pike. Tighenguno timi kumtsu alokivi kije lono qhoqhunhepe puzu ale phe Alhou mlla ke.

³¹ Hezekiya no timiqo vilo pi, “Itehi nonguye achinepulo mitheluvae ike aghakishipu pesu shikimthi keu kumllagho shi AMPEU lau sughilo.” Timiqono aghokulu shi eno panoqo gholo khamiye pututa pulou lono akipti kumlla gho shi ghi aghakishipu lhoxuqo sughike.

³² Panonguno amshitsu lhotsuni, bheri 100 eno bheriti pesu AMPEU lau akipti kumllagho sughike;

³³ panonguno amshitsu 600 eno bheri 3,000 ghi sughi puzu timiqo pelo chupeni ke aghashi keu sughi.

³⁴ Lhoxu hipaqo heqhinike achinemi lukumkha shi aghimove ke ghenguno akumla shitamo ke kutolo Levimino panoqo kuphuke. Tithiu ye achinemi kutomono achinepulo pano likhi panoqo pesu akimthe shiluve. (Achinemi nguno Levimiqouno amikucho shi achinepu lo akimthe shi aghikha ke.)

³⁵ Aghakishi kumllagho akuchopu pitikhave keu nguno alauno achinemiqo ye timiqono chuni keu shi heqhipe mllakeqo lono atha pesu pitini keu eno akipti kumllagho gholo tsukeu atsayi ji leqhini keu makho ghi panonguno shike. Titoi shi puzu Achineki lo akumlla itaghi huthu kithelu.

³⁶ Akukau Hezekiya ngo timiqo ye alokivi shilu, kughengu Alhou no panongu kuphu puzu hipaqo kumtsu achipi lono shilu peke.