YEKIKITHI AKINIU 28 - BAIBEL (BSI)

Juda lo Akukau Ahaz

¹ Ahaz ye ampe muku shi ake lono akukau shiluveno Jerusalem lo ampe chighi tsugho ayeh pelu. Paye pasu David no akuxu kivi xukeu papemove; paye AMPEU lopu kumou shiuve

² eno Israil lo kukami kuxu papewuve. Pano ayino Baal julho shipe qhiuve,

³ Hinom Khila lo tsungqui ta piti kumnauve eno pa likhi panuqo aghakishi shi pesu ajulho lau piti mlauve ke, tiye Israilmi no azuu haighi kelo AMPEU no aghakhu lono haphe vekemiqo no kusakugha pepimhe chekeu kishi shiuveke.

⁴ Asu-atu kumllami no atoghilo mlla chekeu-a lo eno asubo kicheqho kumtsulo Ahaz no aghakishi ngo tsungqui ta piti keu pesu mlla ke.

Siriya ngo Israil sasu Aghushi

^5-6 Akukau Ahaz no achine shive ke ghenguno AMPEU pa Lhou no Siriya kukau pelo pa shou aghu toluvepe eno Judami kutomo Damaska lo akughumi shi sawuve. AMPEU no Israil kukau Ramalia nu Peka pelo ghi Ahaz shou toluvepe eno ghulo lakhi lono Juda ghushimi 120,000 amlo kumtomi pithivetsu. AMPEU panoqo puasu Lhou no hipau shipenike pulosuve tsu kughengu Judamino pa pheve kehuke.

⁷ Isrialmi ghushimi lakhi Zikhri ipikemino Akukau Ahaz nu Maaseia ngo kukaki peitha kicheu Azrikam eno akukau qholo zahtsuu akiniu shiche keu Ilkana ngo ishi pithivetsu.

⁸ Judami ye israilmi sasu akusami aghakhumi shi anamu, Israilmi ghushimino totimi ngo anganoqo 2,00,000 akughumi shi penike kughaluve eno Samaria lo tipaqo sasu idewove eno tipaqo gholo anhemgha kutomo suwuvetsu.

Tungkupu Oded

⁹ Timi lakhi Oded ipikeu, AMPEU wu tungkupumi ye Samaria phughilo ache. Israil ghushimi ide woche kelo Judami akughumi sasu aphughi lo ilo chekelo pano tipaqo sasu kusholu eno pano pi, “AMPEU nongu puasu Lhou ye Juda lau amlo ideveke eno nongu pelo panoqo leluvepe ke ikemu itehiye nonguno kusakugha shi panoqo ghiqhi keu pano chiluvae.

¹⁰ Itehi nonguye Jerusalem ngo Juda lono saghikemi kiptimi totimiqo pesu nongu qemi shiniye kumsu akhani ke. Nongu ghi AMPEU nongu Lhou shou axine shipuani kepi mtha kesha?

¹¹ Itsa inilo! Akughumi hipaqoye nothikuzumi nochelimiqo ke. Panoqo pelo cheve pelo moaye AMPEU no pa loghu lono nongu ghimeqhi nani ke.”

¹² Akukaqha Ahuu sakiphetomi bidi ghi aghushimi kumla lakhake, panoqo jeye, Jehohanan nu Azaria, Meshilemot nu Berekia, Shalum nu Jehizkia eno Hadlai nu Amasa.

¹³ Panonguno pi, “Akughumi hupaqo hila saghi kevilo! Ninguye AMPEU shou axine shivae eno ningu ghimeqhi penike pa loghu shikighide keu lumkhavae. Nonguye itaghi kutau kiuala shipuzu nikipimi alau shipenishi anike.”

¹⁴ Tighenguno ghushimiqono akughumiqo ngo anhemgha xapu ghi keu pesu sakiphemi ngo timiqo ulo suvetsu,

¹⁵ eno timi bidi hu kishephelu puzu anhemgha lepughi keu lono aphimini pesu akughumi ghili kutotsu peni keu shive. Panonguno aphimini ngo apukhu kuqho pupenike tsu, kuchu kushopu lukumkha panoqo tsu eno panoqo ghuzaku lo oliv teli pesu sutsu. Khunoqono ala chenikeu lo lhokutuve keno gadaha shou kughuqa eno akughumi kumtsu Juda ghakhulo Jerikho, amsabo phughi lo sachile sawove. Tithiu Israilmi ye Samaria lo akilo idechile wove.

Ahaz no Asiriya Kukuphu Khu

^16-17 Edommi no itaghi Juda lethuve eno akughumi shini ke kutomo kughaluve tsu ke ghenguno Akukau Ahaz no Asiriya kukatou Tiglat Pilaser vilo akukuphu khu puwu.

¹⁸ Tipa ghuloki lono Filistiyami no kulolau naghuto kuxalo taun akeqo ngo Juda apeu kudau leighi ae. Panonguno aphughi hipaqo leluve: Bet Shemes, Aijalon, Gederot, Soko lo aphughi akeqo, Timna ngo Gimzo eno tipaqo phu eno panongu no tilau ithamono kughunaluve.

¹⁹ Juda lo Akukau Ahaz no pawu timiqo chipiu hexave tsu eno AMPEU phimo gihumo ke ghenguno AMPEU no Juda shou akupuna sughike.

²⁰ Asiriya kukatou no Ahaz kuphunike zuqhulo pa mujochileuve eno pa punaqhive.

²¹ Tighenguno Ahaz no Achineki, kukaki eno sakiphemiqo ki lono shuna luve no akukatou tsuve, ikemu tipauno mu akukuphu kiumu ithumlave.

Ahaz Xineqo

²² Kughou pawu shiluksa no alhoksa kuchou shi akeno Ahaz timi tipauye puzuu nguno alau AMPEU shou axine shike.

²³ Pano Siriyami khunoqo pa shou toluve keno tipaqo lhou lau lhoxu heqhipe mllake. Pano ishi pi, “Siriya lhou qono Siriya kukami kuphutsu ke, tighenguno ino tipaqo lau lhoxu heqhi mlla aye nighi kuphu nani ke.” Hipauno pa shou eno pa shiayeh shou kutsakungo keu sughike.

²⁴ Tinguno alau ghi pano achineki lo peitha keu nhemgha kumtsu ikhi pesu kubopinyive. Pano Achineki khave eno Jerusalem ku-aqha kumtsu lo akiptia shipe qhiwove.

²⁵ Juda lo taun ngo aphughi kumtsu lo pano asu-atu kumlla-a mlape qhi eno tipa qolo tsungqui ta piti kumna pesu inaghami lhouqo lau tsuke. Hikithipu shi puzu AMPEU, pa puasu Lhou loghu pa shou sughike.

²⁶ Pano ka chekelo kutau shipua keqo kumtsu abothu lono ashekha kutolo Juda ngo Israil Kukami Xughili lo yekike puani.

²⁷ Akukau Ahaz ye thive eno Jerusalem lo qhove ikemu tiye kukami kumokilo kumoke. Panu Hezekiya no pa shelo akukau shiluve.