YEKIKITHI AKINIU 27 - BAIBEL (BSI)

Juda lo Akukau Jotham

¹ Jotham ye ampe muku pungu shi ake lono akukau shiluve eno paye Jerusalem lo ampe chighi tsugho ayeh pelu. Pa zaye Jerusha, liye Zadok nga ke.

² Papuno shikeu toi pano AMPEU mlo kiqipu shicheke; ikemu Achineki lo tsungqui ta piti puzu axine shive keulo ye papu toi shimo ke. Tishiepimu timiqoye axine shi acheuve.

³ Jotham no Achineki lo Ahuu Khagho shiqhilu ke eno Jerusalem lo Ofel ipi chekeu qhalo aphughi kupuwulo akumla kutomo mlasu tsu.

⁴ Juda naghutoqo lo pano aphughi shisu eno aghasulo aliwo ngo aghukhua mlaqhi tsu.

⁵ Pano Amun kukau ngo pawu ghishimi sasu aghushi puzu tipaqo toluve. Tithiu pano angka lono Amunmi pelo ampe kuthu kutolo ampe lakhi khilo asuqha hipaqo pa tsupe: tsandiyi kilogram 3,400, ashothi metrik ton 1,000 eno barli thi metrik ton 1,000.

⁶ Jotham ye amikucho shi AMPEU pa Lhou gholu ke ghenguno paye akumto shi thuwuluve.

⁷ Jotham no kakeu ghili kutauqoye, pa ghukishi eno pawu pepimhe yehqo kumtsu Israil ngo Juda lo Kukami Xughili lo yekutsupe puani.

⁸ Jotham no akukau shiluke ghuloki lo ampe muku pungu shiae eno Jerusalem lo ampe chighi tsugho ayeh pelu.

⁹ Paye thive eno David Phughi lo qhove eno panu Ahaz no pa shelo akukau shi pa thisuluve.