YEKIKITHI AKINIU 26 - BAIBEL (BSI)

Juda lo Akukau Uzia

¹ Juda lo akemi kumtsuno Amazia nu ampe chighi tsugho shi akeu Uzia pelo papu thelilo akukau shipenike kisheluve.

² (Amazia thive kethiuno Uzia no Elat le kitheluve eno tipau phughi shikithelu.)

³ Uzia ye ampe chighi tsugho shi ake lono akukau shiluve eno paye Jerusalem lo ampe lhopungu kini ayeh pelu. Paza ye Jekolia, Jerusalem lono ipeghi kemi.

⁴ Papuno shi piye puakeu pape ghi pano AMPEU mlo kiqipu shike.

⁵ Achine kudau pa kukutsuu Zekharia xuaphi kutolo pano amikucho shi AMPEU qeche ke eno Alhou no pa kumghatsu ke.

⁶ Uzia no Filistiyami sasu aghushinike wu. Pano Gat, Jamnia eno Ashdod phughiqo aliwo kupuwu kumtsu tuleqhivetsu eno Ashdod kupunu lo ngo Filistiya lo a-a kutaulo aliwo kupuwu phughiqo shipe qhi.

⁷ Alhou no pa kuphu puzu Filistiyami, Gurbal lo Arabmi akeqo eno Meunimi shou tolu.

⁸ Amunmino asuqha pesu Uzia tsuke eno paye ighono akumto shive kehu pa jekipino Ijip kutolo piwove.

⁹ Uzia no Jerusalem liwo kupuwu shikumto keu shi Acheku Khagho lo ngo Akhila Khagho lo akupuwu veho tsughu keqo-alo aghukheki shipe qhike.

¹⁰ Pano aluza lo ghi aliwo puwusu keu ghukhea shipe qhi eno azu tughuko kutomo chhupe qhike kughengu kulolau naghuto pukhu kuxalo ngo aqa yeghiqolo paye amshi loji kutomo pighiche ke. Pano alukichimi kimiyeche kehu pano timiqo pelo ato yeghilo atsayilu chipeni keu eno aqa yeghilo alu chipeni keu shi hakite cheke.

¹¹ Paye kugho kughomu aghu shikulupu shi ghushimi kutomo kutope puake. Tipaqo ghili yekithi keuye pawu akiyemi Jeiel ngo Maaseia pelo akukau qholo kumlami Hanania no mijetsu keu qholono qhipe puache ke.

¹² Ghushimiqo shou kijemi 2,600 no ahza kutsumi shi cheke.

¹³ Panoqo gholo ghushimi 3,07,500 no phui thai shi ghi pa ghumi sasu kumjo kulumi shi acheke.

¹⁴ Uzia no pawu ghushimi pelo azuto, angu, akutsu kunhayi, amla kunhayi, asuzu ngo apiji eno akighi lono kihipe vepuwu kepu atu kutosuwo qhilupe.

¹⁵ Jerusalem lo pa ghenguno akithe mlaphe kulumi no aghukheki ngo aphughi kupuwu chekuqo lono apiji ngo atuquqo vepuwu lukepu nhemgha mlatsu. Pa jekipino aqha kumtsulo nhakha wove eno paye ighono akumto shive kughengu paye Alhou launo akukuphu ithuluke.

Uzia Ghimeve

¹⁶ Ikemu Akukau Uzia no mutotoive keulo paye qhezauve tipauno pa xakuluqhi kepu shive. Paye pa Lhou AMPEU phimo puzu Achineki lo tsungqui ta kiptia shou tsungqui ta pitiniye shike.

¹⁷ Achineu Azaria gholo achinemi akumtomi eno amlo kuloghimi lhotache no pa pesu akukau

¹⁸ mujochile nike wu. Panonguno pi, “Uzia! Noye tsungqui ta piti pesu AMPEU lau tsukepu khilemu achipi kumoe. Aron launo ikoighikemi achinemi likhino hipau shipenike akimthe shi ikhiphetsu puani. Akimthe-a hipau qhivelo. Noye AMPEU Alhou mlo shipsavae eno noye pawu kukumgha puhavae.”

¹⁹ Uzia ye tile Achineki lo tsungqui ta kiptia phivilo puthugho ake eno tsungqui ta kiptibo tsuqupe ake. Paye achinemi shou amlo ideve no paikhavi lono kumsapu yiko kusu pa kishelo ipeghive.

²⁰ Azaria ngo achinemi kutamiye thughuive no akukau kishelo kutuxoxo jupuku ae eno pa vilo tsuikhomo Achineki qhivepe. Pa ghi khalau akimghi shi ipeveni keu shi, kughengu AMPEU no pa ghimeqhive ke.

²¹ Akukau Uzia ye pa kuxu thaqhulo achinepu lo mithemono acheuve, tiye pa kusu ghenguno ke. Achineki lo itaghi khilemu ilo kithe mlave kehu, pa kumlapu kumtsu pheve no pa likhi pa kilo acheuve eno tishi akelo panu Jotham no akukaqha peithauve.

²² Isaya tungkupu Amuz nuno Akukau Uzia no ka ake ghulokilo shilu keu kumtsu yekutsu puani.

²³ Uzia ye thive eno kukami qhoche keu alo pa kumo qhove, ikemu pa kusu ghenguno pa kumo ye kukami kumokilo qhomoke. Panu Jotham no pa shelo akukau shi pa thisuluve.