YEKIKITHI AKINIU 24 - BAIBEL (BSI)

Juda Kukau Joas

¹ Joas no ampe tsuni shi ake lono Juda lo akukau shiluveno Jerusalem lo ampe lhobidi ayeh pelu. Pa zaye Zibia, Bersheba lono ighikemi ke.

² Jehoiada chineu no xuake kutolo ye paye Alhou pulou kiu keno tipau shicheke.

³ Jehoiada no Akukau Joas ghenguno anipu kini kishe tsuke eno pamano atianuli punutsu ke.

⁴ Pano akukau shikeu ado kushuwa womono Joas no Achineki pukho kitheni keu shi.

⁵ Pano achinemi ngo Levimi vilo ahza tsupuzu Juda lo aphughiqo lo wuno timi kumtsu lau ampelo Achineki pukho kumkha pisa qhasughi peni keu shi. Panongu vilo papashi shilo pi pano pike ikemu Levimino kumnu auve,

⁶ tighenguno pano panoqo sakipheu Jehoiada kusaghipe eno ishi pi, “Kushiye noye Levimi pelo Juda ngo Jerusalem lono AMPEU qeu Muse no timiqo pelo AMPEU no ngoche keu Phiki tucho akepu suqha tsupeni keu shi pipua keu noye jukutomo kya?”

⁷ (Shikupsa atotiu Athalia papemino Achineki shipusa ke eno akimthe nhemghaqo kutomo Baal kumllalo peitha wuveke.)

⁸ Akukau no Levimi vilo ahza tsupuzu qhasu kepu bohu lakhi mlape eno tipau pesu achineki khagholo qhipe.

⁹ Panonguno Jerusalem ngo Juda qha kumtsulo atsa puwu puzu timi lakhi khino Alhou qeu Muse no atughiulo asayeqha lono qha keu suqha toikeu AMPEU lau sughi penikeu shi.

¹⁰ Hipau shi keulo timiqo ngo sakiphemiqo ye amlo kiqi shive eno panonguno asuqha sughi puzu abohu tipau pesu akukauno ampi shipeni ke kishepua tsukemi lau pewuche.

¹¹ Kughono tipau chhitoi veni keno akukau wu akiyeu ngo Achinetou wu kishekiphemi no pisa leluveno abohu ye puzuu alo suwo qhiveche. Titoi shi puzu panonguno pisa amqo kutomo pekutsuluve.

¹² Akukau ngo Jehoiada pamano timi khunoqono Achineki pukho keulo ampi shi akeno pisa pesu tipaqo tsuveche eno timi tipaqono atu mlakemi, asu mlakemi, ayi kiyiqimi pelo pukho keu kumlalo piqesu che.

¹³ Akumlami kumtsu no aka aveshi mlache eno panonguno Achineki shikithe pesu puzuu tho paphi shi mtotoi shiluve.

¹⁴ Kughono pukho tave keno shuna ngo tsandiyi achili aghikeu ye pesu Akukau ngo Jehoiada tsuve, pamano tipaqo pesu Achineki lo akhu ali mlape qhi. Jehoiada no akuxu aphi loye Achineki lo ado achipi lono agha shi keu kumllagho tsuche.

Jehoiada Kumla Xavetsu

¹⁵ Kitemi kutu shive kethiu paye ampe 130 shi ake lono thive.

¹⁶ Panonguno David Phughi lo kukami kumokilo pa qhove tiye pano Israilmi ghengu, Alhou ghengu eno Achineki ghenguno akumla mlatsu keulo pa ikhilu keu lonoke.

¹⁷ Ikemu Jehoiada thive kemtsa Juda lo sakiphemino Akukau Joas zuiza pesu panoqo kukutsu tsa iniuve pe.

¹⁸ Tighenguno timiqoye panoqo puasu Lhou, AMPEU Achine kilo mllaumove eno Ashera lhouliu julho kimihiqo mllathuve. Panongu xine hipaqo ghenguno Juda ngo Jerusalem shou AMPEU loghu sughive.

¹⁹ AMPEU no tungkupumi puwu puzu pa lau ideighi penike kutughuu pe ikemu timiqono initsumoe.

²⁰ Tileno Alhou ghunguno achineu Jehoiada nu Zekharia peithaluve. Timiqono pa ithulu kepu alo pano puthugho puzu ighamuku pi, “AMPEU Alhou no iniju akeuno nonguye kushiye pano ahza tsukeu hebide ani eno no likhi no shou kutsakungo keu sughi ania!”

²¹ Akukau Joas no Zekharia pithiveni keulo kuqhaluve eno akukau zah kutsu lono timiqono achineki khala lono atu pesu Zekharia veqhi pithive.

²² Akukau ye Zekharia papu Jehoiada no aghokulushi pa qeche keu kumsumave eno pano Zekharia pithive peke. Zekharia no thihu chekelo pano igha ishi pi, “Nonguno kiu shi ani keno AMPEU no jutsu peni eno nongu ghimeqhi peni!”

Joas Kuka Kishekha

²³ Tipa mpe tixi tsala ighi kelo Siriya ghushimi no Juda ngo Jerusalem le ighino sakiphemi kumtsu pithive eno tinhemgha kutomo Damaska lo xapuwuve.

²⁴ Siriyami ghushimi ye aghulo likhi ikemu AMPEU no panoqo pelo Judami ghushimi kutomo keu shou toluve pe, tiye timiqono pa qhiveke ghenguno, AMPEU panoqo puasu Lhou panonguno qhiveke. Hitoi shipuzu Akukau Joas ye ghimeqhive.

²⁵ Ighono pa ghuzave eno kughou aghumino idewove keno pa qholo kijemi kinino pa pithivenike kuchughuve eno Jehoiada nu heqhive keu mukhu lutsuni ke ghenguno azualo ake lono pa yive. Paye David Phughilo qhove ikemu kukamiqo kumokilo qhomoe.

²⁶ (Pa pithinike kuchughu kemiqoye Shimea ipikeu Amunmi totimi lakhi nu Zabad eno Shimrit ipikeu Muabmi totimi lakhi nu Jehozabad ke.)

²⁷ Kukami ghili Pikithe tsu keu kakulo Joas nuliqo ghili ngo pa shou tungpu tsa pikeu eno pano Achineki shikithe keu ghili yekithi keu supe puani. Panu Amazia no akukau shi pa thisuluve.