YEKIKITHI AKINIU 19 - BAIBEL (BSI)

Tungkupu no Jehosafat Sakiyi

¹ Juda lo Akukau Jehosafat ye akivishi pa kukaki Jerusalem lo ideghive.

² Hanani nu tungkupu Jehu no akukau sasu kushoni ke ighi no pi, “Lhoksa kughami kuphu eno AMPEU mithi chekemi lau sukeu ye achipi kughashi noye kumsu ani kesha? Nono kiu shive keno tipauno AMPEU loghu oshou sughi anike.

³ Ikemu tishi puaghi namu ololo akivi hami anike. Timiqono mlla chekeu nono Ashera lhouliu jukimihi kumtsu ikhivetsu ke eno noye Alhou pulou papenike pukaputsa ke.”

Jehosafat no Pekithi Kithekeqo

⁴ Akukau Jehosafat ye Jerusalem lo xu ache namu paye ado kamono apeu Bersheba lono ahuu Efraim ato yeghi qha kumxa kutolo AMPEU pano puasu Lhou lau timi kukide saghini ke ghenguno kicheghuzu shi acheke.

⁵ Juda lo putukhasu puakeqo phughi lakhi khilo pano xakuthami kishepe qhiwono

⁶ panoqo lau akukutsu tsa hitoi tsuke: “Kutami tsa kughatha keulo kutokupui shilo; nonguye timi no tsukeu nguagha tsukeu shou bepeno shi anike, kughou nonguno xakutha tsa tsu ani keno paye nongu gholo anani.

⁷ AMPEU sumsalo eno kuto kupui shi puzu xathalo kughengu AMPEU ni Lhou ye akimki, agi jukeu momu kulugho lukeu palokutove mlake.”

⁸ Jehosafat no Jerusalem lo Levimi, achinemi eno aqoaholo akhotomi khami susu puzu aphughilo akemiqo dolo AMPEU Yezah hexave keu mutomushu aghi keulo ayeh kiqi lono xakuthami shipe ke.

⁹ Pano akukutsu tsa hipaqo pesu panoqo tsu: “Nonguye AMPEU sukumsa lono nokumlapu saje shitsu masake, thwokha kumtsulo amikucho shi pa gholu masake.

¹⁰ Kugho kughomu noghakhumi akusami lakhino aphughiqo gholo lakhi lono timi heqhive keu tsa kughanike nongu zulo sughini momu ayezah eno ahza hexave keu kutau kiuala sughi kelo panongu tsa kugha akelo panoqo ye kiu toi kishi kutokupui masa keno nonguno panoqo lau akukutsu tsa tsulo tishianguno panongu pelo AMPEU shou axine kuiqu shipemoni ke. Nonguno titoi shimo napiaye nongu eno noghakhumiqo ye AMPEU loghu kighide pukepu shive nani. Ikemu nongu kumlapu saje shilu aye nonguye akuiqupu angsu shimo nani.

¹¹ Achinetou Amaria no achine yeh lo kughakepu kumtsu shou agha kipeu atou shinani eno Ishmael nu Zebadia, Juda lo peitha kicheu no aqoaho yehkipelo kugha kepu kumtsulo agha kipeu atou shi nani. Levimino kughakilo kiu xatha tsukeno tipau shikupu ani kemo keno juni keu makho puni. Amlo kuloghi shilo eno akukutsu tsa hipau shi wolo eno AMPEU pelo achipiu shikeu kudau apeniu!”