SAMUEL ATUGHIU 31 - BAIBEL (BSI)

Saul ngo Panuli Kithi

¹ Filistiyami no Gilboa naghuto lono Israilmi sasu aghushi. Tipau ghushilo Israilmi kutomo pithive eno kutamiye akukau Saul ngo panuli gholono pokhave.

² Ikemu Filistiyamino panongu haluve eno Saul nu pano kuthu Jonatha, Abinadab eno Malkishua ghi heqhi pithive.

³ Panonguno Saul botha pe ihulokeu aghushi thuve, tishikeu lono aghumi leghuno Saul aloqhi ghuzave.

⁴ Pano apumi pa ghunanu xapukicheu vilo pi, “Ozutakihi sujo pe ighiqhi pithivelo, tishi anguno hi Alhou kumthami Filistiyami pelono ithaigha iheqhi pithive pemonike. Ikemu apumi huno tishini keu ighono msa sheve. Tighenguno Saul no pa likhi pa zutakihi ikhiluno tipau shou ikiqi ikuno thive.

⁵ Tileno apuu pa ghunanu pekicheu ghi Saul thivekeu ithulu puzu pa ghi pa likhi pa zutakihi shou ikiqi ikuno Saul sasu thikuqhave.

⁶ Hitoi shi Saul ghi, panu kuthu eno apuu pa ghunanu pekicheu ishi thive; eno tipa tsala lono Saul wu timi kumtsu thikhave.

⁷ Kughou Israilmi khunoqo Jezril khila halau ngo akemi eno Jordan kipelau akemi qono Israilmi ghushimi pokhaveno Saul ghi panu kuthu ghi heqhi pithi khave pikeu chilukeno panongu ghi taun qhiveno pokhave. Tishike lono Filistiyamino ighino taunqo lo ngolukhave.”

⁸ Aghushi wo thoghiu Filistiyamino timi kumoqo pekutsuve niye ighike lono panonguno Saul ngo panu kuthu kumo ghi Gilboa naghutolo aghikeu phulu.

⁹ Panonguno Saul kutsu michetha pevetsu eno pa ghunanu xaluvetsuno aghinikishimi hapesu Filistiya yeghiqha kumtsulo asutsa kivi hipau pesu panongu suatu lhouqo eno timiqo pithi wope.

¹⁰ Tishino panonguno pa ghunanu ye suwo alhouliu Astarti chinekilo qhive, eno pa phimipiye Beth Shan phughi tozulo yeda pe qhive.

¹¹ Kughou Gilead lo Jabes timino Filistiyami no Saul lau kiu shivekeno tipau ghili chiluno,

¹² timi amlo kivimino putho lono ala chesusu Beth Shan lo wu. Panonguno Saul kumo eno panu kuthu kumo qo ishi atupikiye tozu lono ikhiqhiluveno xapu susu Jabes taun lo ighino amino pitive.

¹³ Panonguno asaghiye kiche kumqo puzu Jabes taun lo tamarisk subo qholo qhovetsu, eno atsala tsuni kutolo kumvue.