SAMUEL ATUGHIU 27 - BAIBEL (BSI)

David no Filistiyami Gholo-a

¹ David no pa mlo lono ishi kumsu, “Ghulo lakhiye Saul no iheqhi pithive nani. Ike niye Filistiya lo poveke pavi nani. Tishi anguno Saul ye Israil yeghilo iphu chekeu shimove nani eno niye sushokulu aveniae.”

² Tighenguno David no pawu timi sasu paikhavi lono Gat lo akukau Maok nu Akis lau wuve.

³ David eno pawu timiqono panongu kibo sasu ighino Gat lo a-a shiluve. David ye pa nipu kini; Ahinoam Jezril lono ighikeu ngo Abigail puzuu Nabal nipu Karmel lono ighikeu pama sasu wue.

⁴ Kughou David no Gat lo pawu timiqo sasu chevae pikeu chilukeno tinguno tilauye Saul ye pa phuwumove.

Akis no Ziklaq pe David Tsu

⁵ David no Akis vilo pi, “Tsala nono isasu ashou shi ani aye, ipelo ngolupe kepushi taun aghulo lakhi itsulo. Akijeu, ighenguye osasu aphughi kijelo ngokepu kumu avehu kuha.”

⁶ Ikehu tipa tsalanino Akis no Ziklag pesu David tsuve; tileno huthu susu ishikutolo Ziklag ye Juda lo kukami wu shive.

⁷ David ye Filistiya yeghi a-a tipau lo aqhi chighi tsugho ngolue.

⁸ Tipa ghulokilo David eno pawu timiqono Geshur, Girzi eno Amalek lo khunoqo ado kushuwa lo tipau qhalo aighive keno tipaqo lethuve. Pano panongu yeghi lesu Shur kutolo wu eno apeu Ijip kutolo leiqi,

⁹ Kiptimi, totimi kumtsu heqhivetsuno panongu wu bheri, amshi, gadaha eno aphinhemgha kutolo luvetsue. Tishiveno paye Akis lo ide ighikelo

¹⁰ tile kuamino pa vilo ishi inijuche, “Noye ishiye khikudau lewuno ighi anikya?” ipi aye David no paye Juda yeghi apeu kudau momu Jerahmeel shiyeh qono akeu bokhu qhau momu khile Kenimino kughuna achekeno tikudau lewuno ighi anipi khochile che.

¹¹ David no kiptimi totimi kumtsu ghiqhikhavetsu tishikeu lono khuunomu Gat lo idewo pa ngo pawu timino kiu mlavekeno tipaqo ghili pithilu pemoniye shivetsu. Hitoi shi-ghi David no Filistiya yeghilo ngo ake thaqhulo tishi mlavetsuke.

¹² Akis ye David pukhubeche eno ishi kumsuche, “Pawu timi Israilmino pa jukuchhube acheni; tighenguno paye alhokuthu iqu axemi shi cheniala,” ipi.