SAMUEL ATUGHIU 26 - BAIBEL (BSI)

David no Saul kuxu Pukhalu

¹ Timi khami Zip lono Gibea lo Saul lau ighino pa vilo David ye Hakila tolo Judia ghasaqha apeu itshu akeu pithi.

² Saul no paikhavi lono Israil lo ghushimi akivimi 3,000 sasu Zip ghasalo David phuwunike cheve,

³ Hakila tolo wuchekeu laghilo panongu ghazu shilu. David ye tikutolo aghalo itshu acheke, ike kughou Saul no pa phucheni pikeu ithive keno,

⁴ pano aghupuu puwuno miqe juwu pekelo kuchouno Saul ye tilehi ngo aghi.

⁵ Pano paikhavi lono wuno khilehi Saul ngo Ner nu Abner khuu Saul wu ghushimi shou ahzakutsuu shi akeno pamano zuakeua jukimchipe qhiluve. Saul ye aghazu alou zuae eno pawu timino pa homxa pesu zu akhae.

⁶ Tileno David no Ahimelek khuu Hatimi lakhi keno eno Abishai khuu Joab thikuzuu keno (pama pazaye Zeruiya ke), pama vilo ishi iniju, “Nokujo khuuno isasu Saul ghazulo wuni kya?” Abishai no khochile, “Ino wuni.”

⁷ Tipaji David ngo Abishai pamano Saul ghazulo ighikelo Saul ye aghazubo mtadolo pa ngupa pesu pa kutsu phivilo ayeghilo su suveno zu aghi. Abner ngo ghushimi no pa suhomxa pesu zu aghikhae.

⁸ Abishai no David vilo pi, “Alhou no itijino oghumi kughapesu oulo phesuve tsuae. Tighenguno ipelono pa likhi pa ngupa pesu chhe khavi lono ayeghilo chheda kuqhavepelo, niye ghuthu kini chhekepu shitsumoe chhekhavi lono kutove tsunie!”

⁹ Ikemu David no pi, “Noye pa ghimekepu kumoe! Kughengu AMPEU no khuu khuumu pano kishevekeu akukau ghimekeuye aghime tsuni putsae.

¹⁰ Xukuau AMPEU jelono pi ani, AMPEU no pa kutoshino Saul heqhi pithive nani, ike tiye pa kithi ghuloki ighike lonomu thive nani momu aghukishi lonomu thive luvie.

¹¹ AMPEU no khuu pesu akukau shivetsu akeno tipau shou ino au benikeu momu ghime keuye AMPEU pulou kumoe! Tighenguno nikujo pa ngupa ngo pa zubohu likhi pesu wuveni shilo.”

¹² Ike David no Saul kutsu kumkhu lono angupa ngo azubohu ikhiluveno Abishai pamaye cheve. Tilehi khuunomu ti ithulumo momu kiu shive keno khumu mthae momu zuida ithughimoe, panongu kumtsu zuqei akhae. Kughengu AMPEU no akuzukutho panongu lau puwuveke.

¹³ Tishive kethiu David ye akhila tuxatsau naghuto tsuqalo kushuwolo ado bido shikeulo wuveno

¹⁴ Saul wu ghushimi ngo Abner lau ighamuku pi, “Abner! noye isutsa chilu anima?” Abner no iniju, “Khuuno tile tishi igha anikya? eno akukau kuda puthuve anikya?”

¹⁵ David no khochile, “Abner, noye Israilmi gholo akijeu shi anike kumo kesha? Tishiaye kushiye ompiu akukau susho tsumo kya? Itehi khamino aghazulo iloghino ompiu heqhiveni chei.

¹⁶ Noye okumlalo tomovae, Abner! Ino xukuau AMPEU jelono tushoqhi pi anike nongu kumtsu thive kuzupu shiae, kughengu nonguno nongu mpiu, khuu AMPEU no akukau shitsukeno tipau khemoe. Julo! Akukau wu angu khile ani kya? Azubohu pa kutsu kumkhu phivilo akeu khile anikya?”

¹⁷ Tileno Saul no David sutsa kimchiluveno iniju, “David, tiye no kesha, inu?” David no khochile “Iyei, akijeu,”

¹⁸ Pano highi ishi pikupha, “Akijeu, kushiye noye itehi kutolo ni oqeu hachephi kya? Niye kiu shivekeno? Niye kiu mla kuqu puani kya?

¹⁹ Akijeu, ino kiu pinikeno ti inijutsulo. Tsala AMPEU no oxukideno imithi aghi aye akumllagho pa lau tsukeu vechewono pa mlo kililu nani; ikemu tsala timino hishi aghiaye, AMPEU loghu panoqo shou ikughipeniu. Kughengu panonguno AMPEU yeghi lono ihapheveno ipelono inami yeghilo inami lhouqo likhi mllaluvepe kepu shi vetsu anike.

²⁰ Inami yeghi lono iheqhi pithive kevilo, AMPEU launo kushuwolo wuvepe kevilo. Kushiye Israil lo akukauye ighino axuahi paphishi iheqhinikya? Paye kushiye aghau hachekeshi ihacheni kya?”

²¹ Saul no khochile, “Ino mla kuquvae. Ide ighivelo, inu, David! Niye khilemu akiniu oghime moae, kughengu nono itiji ikuxu pukhalu tsue. Ino tumhotuzu shivae! Ino kumsapu kumla mlavae!”

²² David no khochile, “Akijeu, ongu hilo. Owu timi lakhi pelo hilau ighino ikhilupelo.

²³ AMPEU ye khunono aghokulu eno amikucho shichekeno tipaqo agho tsucheni. Ishi pano okugha pesu iulo phesu tsue, ikemu niye AMPEU no khuu pesu akukau shipuani keno pa shou au chhomoe:

²⁴ Ishi ino kiutoi okuxu pukha phelu tsukeno tihutoi AMPEU pelono ixaphelu eno akukupuna ghime jeli kumtsu lono ikhaqhi phetsu peniu!”

²⁵ Saul no David vilo pi, “Inu, AMPEU pelo okumgha tsupeniu! Nono kiu shikeno ti kumtsu tokuluu shilu nani!” Tishino David ye pa lalo cheve eno Saul ghi akilo idewove.