SAMUEL ATUGHIU 25 - BAIBEL (BSI)

Samuel Thive

¹ Samuel ye thive, eno Israilmi kumtsu kumtsa ighino pa ghenguno mlo qa tsue. Tishino panonguno pa phu Rama lo pa kumo shiqhove tsu. Tipathiu David ye Paran ghasaqhalo wuve.

David ngo Abigail

² Maon lo timi lakhi ache eno paye Karmel lo lhidi shikichemi. Timi huye ighono kinimi; paye bheri 3,000 eno ane 1,000 ishi pighi ache. Paye Karmel lono bheri mhi tsa suwo jecheke.

³ Pa je Nabal eno pa nipu jeno Abigail ke. Totimi huye suqe suli kighithimi alokutsumi eno jukivike, ikemu akipitiu ye ayekumthami eno amlo papashi idekemi eno paye Kalib lagha lono ighikemi.

⁴ Nabal no bheri mhi tsa ani pikeu David no aghasa lono chilu.

⁵ Tileno David no apumi chighi hapuwuno panongu vilo ishi pi, Karmel lo Nabal lau wuno ije lono petha pa tsulo.

⁶ Nonguno petha pa tsughi ishi pilo: “Kumghakeu olau, nokilo eno nono kiu anikeno tipaqo kumtsu shou alupelo.

⁷ Nono owu bheri mhi tsa anipikeu David ye chilu eno owu bheri khemiye ni gholo ngo akemu ninguye kumu panongu ghimemoe, panonguno Karmel lo acheke ghulokilo kiu nhemghamu puhamoe.

⁸ Panongu inijulo eno panonguno ovilo pinanike. Ningu apumiqoye Aghulhu Tsala ghenguno ighi ani eno David no ovilo pi akeuno akivishi ningu sasutsulo ipi ani. Tighenguno nono kiu anikeno ningu tsulo eno oshou kiviu David lau ghi tsupuwulo.”

⁹ Panonguno David je lono asutsa tipaqo pesu Nabal vilo pike. Tishipuzu panonguye tile ngokhe ae,

¹⁰ ashekhalo Nabal no khochile “David ya? Paye khuu kya? Niye khilemu pa ghili chilu mphie! Itodolo ni ghakhulo aquaxemi kupokichemino chhitoi ani!

¹¹ Iwu bheri kipighi miqo ghenguno lhoxuqo heqhikeu pesu timi khilauno ighikemi keno kumu mtha keloye niye tsuve mlae eno tishinikeloye niye libetuzu mu chushoni chemoe”

¹² Tileno David wu timiqono pa lau ideighi puzu Nabal no kiu tsa pikeno pa vilo pi.

¹³ “Nongu zutakihi chhepuluvelo!” pi David no ahza tsu eno panongu kumtsuno tishi kutoluve. David ghi pa zutakihi chhepuluve no pawu timi 400 sasu cheve, 200 no a-alo achuqu kusho pekishe tsupenikeu shi kutope qhive.

¹⁴ Nabal qemi gholo milakhino Nabal nipu Abigail vilo ishi pi, “David no aghasaqha lono pa ghinimiqo hapuwu puzu ningu mpeu lau petha sughi tsue, ikemu pano tipaqo phimo ghi jukunatha vetsu.

¹⁵ Tishimu panonguye ningu lau akivi mlae; panonguye khilemu ningu sapusamoe, ningu kumtsa alulo tishi ngo achekelo ni nhemgha kumu puha pighimoe.

¹⁶ Nino pano phivilo ngono bheriqo khe akelo putho pucho kumtsulo panonguno ni susholue.

¹⁷ Tighenguno tipau ghili kumsuluno kiu shimasa keno kughakutha shilulo. Kughengu shikupusa ningu mpeu eno pa laghaqo kumtsu shou ighiniye kuto ani. Paye pa gho kumoaye kutami tsa ini nichemoe!”

¹⁸ Tileno Abigail no paikhavi lono ashopa 200 ashiyiko hughi kini lono aji pilisuve, bheri pungu akuchopu no kusavekeu, kumpakeu thi kilogram chighitsuni, atsai kipki apho 100 eno pikivekeu khughuthino shikeu shopa 200 ishi kumtsu amqo shino gadaha xapipe.

¹⁹ Tishino lino aqemi vilo pi, “Nonguye hi xapusu kholo, nighi nongu papesu ighini.” Ikemu liye kumu li kimi vilo hipaqo ghili pimoe.

²⁰ Lino liwu gadaha lono atuxu muxaghi iqhocheke lono David ngo pawu timiqo ghi li kudau iqi chekelono kusholu.

²¹ David ye ishi kumsu ghi iqiche, “Niye kushiniye adou lono timi hupau tinhemghaqo aghasaqha lono sushotsu ache kela! Pa nhemgha kitilamu puhapighimoe, eno ino pa lau akivi mlakeu theli alhoksa pesu itsuchile ani.

²² Tsala thanau tokumolo ino pawu kiptimi khijehi anikeno tipaqo lakhimu ghumono pithive moaye Alhou pelono niu heqhi peni!”

²³ Kughou Abigail no David ithuluvekeno lino mtazu ilhe iqighino ayeghilo pishiqho.

²⁴ Lino pa pukhu philo pishiqho no ishi pi: “Impeu, akipimi ishou likhi bevetsulo. Oqeliu pelono oputsa lupelo; eno oqeliuno kiu piniye anikeno iniju tsulo.

²⁵ Kimiyeno, Nabal ghenguno kumu omlo shimo tsukevilo, paye kumu avehu kuha! paye pa je kiqi shi tumhotuzu lono xuacheni. Nono oqemi hapuwuke ghulokilo niye tile kuhae, Akijeu.

²⁶ Oghumi lau amkhu lunikeu eno heqhinikeu lono oshokhalu keuye AMPEU noke. Ino xukuau AMPEU jelono tushoqhi anike oghumi eno oghime nishi akeqo kumtsu lau Nabal ghime ketoi shilo.

²⁷ Akijeu, kimiyeno ino otsuniye agho hi sughikeu ikhilu tsulo eno hipau pesu owu timiqo tsulo.

²⁸ Akijeu, kimiyeno ino mlaitha pimi puaghiaye akipimi qhivetsulo. AMPEU no opesu akukau shive nani eno olaghaqo ghi kalu nani, kughengu nono pa ghushiqalo kichighitsu ani; eno nono akuxu ake thaqhulo kumu alhoksa mlamo nani.

²⁹ Tsala khuualano oheqhiveniye ole ighi namu AMPEU oLhou no osusholuve nani, timi lakhino akughupu nhemgha khe akeshi nani. Ikemu oghumiqo ghenguye kiu kiu shinamu timi lakhino hevula kighi lono atu vepuwuve ketoi pano panoqo peve nani.

³⁰ AMPEU no olau akivi kumtsu mlatsue eno opesu Israilmi kukau shitsue.

³¹ Ikehu kumu jekujeli kuhano heqhivetsukeu momu olikhi omukhu lukeulo amlo iju momu amlo ime akepu kuha. AMPEU no kughou okumghave tsuni keno, akijeu, ikumsumave tsukevilo.”

³² David no li vilo pi, “AMPEU shelo, Israil Lhou, pano ishi ohapuwuno isasu kusholupe!

³³ Alhou shikimthi okukumsu kivi eno nono ishi kiu mlakeno tipaqo ghengu eno ipelono ilikhi imukhu luniye eno hekiqhi kumla shiniye akeu lono suchilelue.

³⁴ AMPEU no oghime veniye akeu lono shokhalue. Ikemu ino xukuau Israil Lhou jelono tushoqhi pi anike, nono kighitheno isasu kusholumo kena piaye Nabal wu kiptimi kumtsu tsukutho tomono heqhi pithikhaveni cheke!”

³⁵ Tishino David no lino pa ghenguno kiu gho sughitsu keno ikhiluvetsuno li vilo ishipi, “Akiu wovelo, kuumu amlo sakevelo. Nono kiu lunishi anikeno tipau shitsuni.”

³⁶ Abigail no Nabal lau akilo ide ighike ghulokilo paye aghulhu kije kukami lakhi hutoi shi aghi. Paye aloqhi shomzu pesu agi hughughuyi ngo aghive, tighenguno liye thanau tomoke kutolo kumu pa vilo pimoe.

³⁷ Thanau Nabal no alotsuluvekelo pa nipuno thwokha kumtsu pa vilo lhepiye keloye pa mlo ithamove eno paye aphiau thive.

³⁸ Atsala chighi thiu AMPEU no Nabal buve eno paye tileno thive.

³⁹ Kughou David no Nabal ye thivae pikeu chilukeno pano pi, “AMPEU shelo! Pano Nabal shou amkhu luve tsua, kughengu pano itha igha keu ghenguno eno ni pa qeu pelono kuqu pimi veniye akelono suchileluve peke. AMPEU no Nabal kumla lhoksa ghenguno pa ghimevae.” Tishive kethiu David no Abigail sa anikeu shi asutsa tsupuwu.

⁴⁰ Paqemino Karmel lo wuno li vilo pi, “David no ni hapesu noye pa nipu shipenike osasu ighilo pi ani.”

⁴¹ Abigail no ayeghilo itsaqino pi, “Niye pa qeuke eno pa qemi pukhu qhutsunike kutope ani.”

⁴² Lino pai ithughino liwu gadaha shou ikuluve. Li gholo aqelimi pano pungu sasu wu eno liye David qemiqo gholono David kilo ighi eno pa nipu shiluve.

⁴³ David no Jezril lono ighikeu Ahinoam ngo Abigail pama pesu pa nipu shiluve.

⁴⁴ Ikemu Saul no panga Mikhal David kilo puwokeu pesu athiuye Gallim taun lono ighikeu Laish nu Paltel kilo kula puwove.