SAMUEL ATUGHIU 21 - BAIBEL (BSI)

David no Saul launo Pove

¹ Tipathiu David ye chesu Nob lo Ahimelek achineu lau ighi. Tile Ahimelek ye msakhokho shi khalacheu pa sasu kusholu nike ipeghi eno ishi iniju, “Noye kishi puzu olikhi hilehi ighilukya?”

² David no khochile, “Niye hile akukau ghini shisu ighi ani. Pano ihapesu hilehi kiu shipeni ye ighi anikeno khuu pelonomu ithi pekevilo pi ani. Iwu timiqo ghenguye a-a hami lono isasu kusholulepi ino panongu vilo pivae.

³ Tishiaye noye kiu chukepu aulo anikeo kuhakya? Ashopa pungu momu kiu kiumu nono aghikeu pesu itsulo.”

⁴ Achineuno khochile, “Niye inapugha sho kitilamu kuhavae ikemu ikhiphe shikimitheve keu sho likhi ani; nono timu luniaye lulo, tsala owu timino totimi sasu kitiqe mono aghi aye.”

⁵ Tileno David no achineu khochile, “Iwu timiye avehu tachutaghulo kutukha aghini puwukelo achine kitiqe chemoe, tishiaye tinguno alau ninguye ishiye pakutakeu ghini shisu ighi anike ghenguno kumu kitiqe pua moe.”

⁶ Tighenguno achineuno akimthe sho pesu David tsuve, kughengu pano akeuye asho khikhi ikhiphe Alhou tsuvekeno tipau sho likhi ae, eno asho tipauye akimthe kibepu alono ikhiluveno akithe sho suwo atsala lono kilive ghi shicheke.

⁷ (Saul mishi khemi atou Doeg ye Edom lono ighikemi, tipa tsalaniye pano a-a tipaulo ngo ae, paye achine hami shikupu kepu shi ake ghenguno.)

⁸ David no Ahimelek vilo pi, “Noye itsukepu angu azuta kuhakesha? kughengu akukauno ighono mighimghai aghini ipulu puwu keu lono niye izuta mu aghunanu mu ikhilukepu do ithumlave.”

⁹ Ahimelek no khochile, “Niye Filistiyami Goliat, khuu nono Ela khila lono heqhivetsu keno pa zutakihi aphino kuzuveno ti achinepu phikuzu thiu puani. Aghunanu tilikhi ani.” David no pi, “Ti itsuvelo, tinguno azutakihi kivi kutauye kuha.”

¹⁰ Tishino David ye Saul launo cheve eno Gat lo akukau Akish lau wuve.

¹¹ Akukau gholo kijemino Akukau vilo pi, “Hiye David kumo kesha? pa ghakhumi shou akukau shi akeu hu kumo kesha? Totimino ilhe shepili akeu timi hipau kumo kesha? Panonguno ishi pheke kumo sha? ‘Saul ye 1000 heqhilu, Ikemu David ye 10,000 heqhilu.’ ”

¹² Panongu tsa huno David mlolo ighono chishivetsu, tishikeu lono paye akukau Akish ighono msa sheve.

¹³ Tighenguno panonguno kugho kughomu David suhomxa pesu ighikelo, pano kughuzumi ghili shipesu piye eno panonguno pa lakhaniye putosulo wuche aye aphughi khagholo ayeh hesu kulakulai yepukuvetsu; eno pa mutsazuno pa kichimhilo qole iqighi ghi kughuzumi ghola shipe piye,

¹⁴ Tileno Akish no pa qemi vilo pi, “Julepi timi huye izu ani; kushiye nongu ye pa sasu ilau ighikya?

¹⁵ Niye kughuzumi kutomo kuhasheo? Kushiniye itaghi kughuzumi hipau hilau sasu ighino igizulo pa ghuzu ghili shipe piye anipe kya?”