SAMUEL ATUGHIU 19 - BAIBEL (BSI)

Saul no David Ghime

¹ Saul no panu Jonathan ngo pa qholo kijemi vilo paye David pithiveni keu kuchughu akeu pesu pithi tsu, ikemu Jonathan ye ighono David ju pa loche

² kehu tipau ghili pesuno pa vilo ishi pi, “Ipuye oheqhi pithive niye kughu ani. Noye thoghiu inaqheye ighono kutokupui shilo; khileala achekulo itshuu no ngovelo.

³ Niye wunani eno alu khipaulo nono itshu aghinikeno tipaulo ipu sasu ngo nani eno ino oghili pesu pa vilo pitsuni. Tsala ino kiu kiumu phulu aye ino opelo ithi pe nani.”

⁴ Jonathan no David kivi ghili kishekulushi papu Saul vilo lhetsu eno pa vilo hitoi pi, “Akijeu, noye oqeu David lau kumu axine shipuku kevilo. Kughengu paye kumu olau alhoksa mla puamoe; ikemu alhoksa zuqhu pano kiu mlakeno ti kumtsu oghenguno akukuphu kije lakhi shi otsulu ani.

⁵ Paye pa kuxu kumsapu shi ghi Goliat veqhivetsu kelono AMPEU no Israilmi shou tokulu kije puwutsue. Noye kughou ti ithulukeno tile noghi alovi ae. Tishiaye kishi puzu noye kumu akipimi kuhakeu timi lau alhoksa mlaniye shikya? Eno kumu jekujeli kuhano David heqhiveniye shi ani kya?”

⁶ Tile Saul ghi Jonathan no kiu tsa pa vilo pikeno pa mlo buvetsuno David heqhi pithimo nikeu shi AMPEU je lono tushoqhive.

⁷ Ike Jonathan no David ku puzu pa vilo kumtsu pivetsu; tishino pano pa sasu Saul lau wuno David ye puzuu pano shicheketoi akukau qeuve.

⁸ Filistiyami sasu aghushi kepushi ipeghive. David no panongu leno theqhiluve kehu panonguye pokhave.

⁹ Ghulo lakhi ghi aghungu lhoksa AMPEU no puwukeu no Saul peitha luve. Paye angupa pa ulo pesu pa kilo iqa a, eno David ghi tile pa lebo igha ghi ngoa.

¹⁰ Saul no pa ngupa pesu David atozulo chheda kuqhaniye chhepuwu, ikemu David no tsughu luve keu lono angupaye atozulo chhepukuve, tileno David ye pojo susuwuve.

¹¹ Tipaji Saul no timi khami David kilo puwuno miqeju apeno thanau ye pa heqhive penikeu shie. David nipu Mikhal no pa piputo, “Tsala itijino polumo aye thanauye oheqhiveni keu shi ani.”

¹² Tishino lino alasheu no pa pupove, eno paye posuwo itshuve.

¹³ Ipuzu Mikhal no ajulho lakhi pewo azua lakhilo puzuve eno ane mhino shikeu kutsu kumkhulo pa kutsu sa toi shipe qhivetsuno aphino akivishi kuzupe qhive.

¹⁴ Kughou Saul wu timino David kughaluniye ighi keno Mikhal no panongu vilo paye su anie pi pive.

¹⁵ Ikemu Saul no itaghi pano qo hachile pesu panongu ampino David phusaghilo pi ahza tsu, “Pa zua lono pa kuhopesu hile ighilo eno ino pa heqhi pithiveni.”

¹⁶ Kucho panonguno aki sholokuu iloju keluye alupalo ajulho hu puzu puaghi, ane mhino shikeu kutsu kumkhu shou be puaghi.

¹⁷ Saul no Mikhal vilo pi, “Noye kushiye hishi ipishiqhiveno ighumi pelo pove pekya? eno khilau itsu wuve ape kya?” Tileno Mikhal no Saul khochile, “Pano ivilo pikeuno ino pa pelo itshuwuve pemo aye iheqhivenie piuveke ghengunoke.”

¹⁸ Ike David ye poveno itshu wuve, eno paye Rama lo Samuel lau ighino Saul no pa lau kiu mlakeno kumtsu kishekulu pa vilo lheve. Tishino Samuel pama kumtsa wuno Naiot lo ngove.

¹⁹ David ye Rama lo Naiot ipikeu alo ngo aniepi Saul vilo pithive,

²⁰ ike pano timi khami hapesu pa kughasaghi penike puwu. Samuel no panongu sakipheu shino tungkupumi alojino tungkuputsapi ilhe akeu panonguno ithulu. Tileno Alhou ghunguno Saul wu timiqo shou ghi qhasuluve eno panongu ghi ilhe igha thuve.

²¹ Kughou Saul no ti chilukeno pano aghini kishimi alau puwu, ikeuloye panongu ghi ilhe ighathuve. Pano akuthuu ghi aghini kishimi hapuwu eno panongu ghi azuumiqo toi shiuve.

²² Tighenguno ashekha loye pa ampino Rama lo wu. Pano chesu Seku lo azukikhe kije akeulo ighino Samuel ngo David pamaye khilehi ngo anikeapi iniju eno pamaye Naiot lo aniepi khochile.

²³ ike paye chesu tikudau wuche, tileno Alhou ghunguno pa qhasuluveno pa ghi Naiot tokumo kutolo ilhe eno ighasusu wue.

²⁴ Pano pa phimini xaqhiveno Samuel nhekithelo ilhe eno ighathuve eno paye aphimino pepumo no putho pucho aphi kumsa shi ngove. (Hishi shivekeu lono ishi picheni, “Saul ghi tungkupu lakhi ilhovekesha?”)