SAMUEL AKINIU 1 - BAIBEL (BSI)

David no Saul Kithi Chilu

¹ Saul thive kethiu David ye Amalekmi shou toluveno ide ighi puzu Ziklag lo atsala kini ngolu.

² Thoghiu apumi lakhi Saul ghazu lono ighi. Pa mlo kusa piyenike ghenguno pa phi suxuve eno ayeghi pa kutsulo ebe puku. Pano David lau wupuzu sukumsa michi shi itsa iqi piye tsu.

³ David no pa iniju, “Noye khilauni ighi anikya?” “Niye Israil ghazubo lono pokasusu ighi ani,”

⁴ “Kiu shivekeno ivilo pilo” David no pi. Pano khochile, “Niwu ghushimiye aghushiqa lono pokhavae eno kutomo tithive tsuae. Saul ngo panu Jonathan ghi heqhi pithivae.”

⁵ David no pa vilo iniju, “Noye kishino Saul ngo Jonathan pama thivapi ithi anikya?”

⁶ Pano khochile, “Akumghashi niye Gilboa naghuto lo wulue ike tile Saul ye pa likhi pangu kutuqhu pesu akeu eno aghumi khurkulu ngo khur ghushimino kupunukhoi pa hasusu ighikeu ithulue.

⁷ Tishi akelono pano tsughuide ighi kelono ni ithulu puzu ikue. Ino ‘Akijeu’ ipi pa khochile.

⁸ Pano ivilo niye khuu kelapi inijuke ino pa vilo niye Amalekmi lakhi kepi pa khochileve.

⁹ Tileno pano ivilo pi, ‘Hilau ighino iheqhivelo! Niye ighono alhoksa shi izavae eno niye thiveniye kutovae.’

¹⁰ Tighenguno ino pa lau wuno pa heqhi pithivae. kughengu paye kiu kiu shinamu thiveni keu mutsuqhei ithiveke. Tishino ino pa kutsu lono akutsukuqho eno au kukha pau lono ikhijo luvetsuno ti kuma ino hi olau sughitsu ani, Akijeu.”

¹¹ David ye amlo ghime launo pa phi suxuve, eno pawu timiqo kumtsuno tishi shie.

¹² Panonguye ighono amlo imeve eno kijiliu kutolo Saul ngo Jonathan eno Israilmi, AMPEU wu timiqo ghenguno kumsuqa eno kumvue, kughengu kutomo aghushi kelono pithive tsuke.

¹³ David no asutsa pa lau sughi akeu apumi vilo iniju “Noye khilehino ighikemi kya?” Pano khochile, “Niye Amalekmi kemu niye oghakhulo xuwuvekemi lakhie.”

¹⁴ David no pa iniju, “Noye kishipuzu AMPEU no kisheve keu akukau heqhi nikeu amlo kuloghilu kya?”

¹⁵ Tile David no pa timi gholono milakhi kupheno pi, “Pa heqhi pithivelo!” Ikehu kuchono timi huno ighino Amalekmi hu heqhi pithive.

¹⁶ David no ishipi “Hiye olikhi oshou sughike. Nono AMPEU no kishephekeu akukau heqhi pithivepi olikhi okutoshino lhekeu huno olikhi otha ighavae.”

Saul ngo Jonathan Kumsuqa

¹⁷ David no Saul ngo panu Jonathan pama ghenguno ale hipau phe,

¹⁸ Juda lo timiqo pelono shika penikeu zah shitsu. (Hiye Jashar kaku lono yekutsu puani.)

¹⁹ “Israil to lono ni sakiphemi thive! Ningu ghushimi gholo amlo kivimiqo ikiqive!

²⁰ Gat lo hipaqo pitsu kevilo momu Ashkelon laghilo pitsu kevilo Filistiya topumi pelono alovi pekevilo; Ayekumthami ngaqo pelo alokivi shipekevilo.

²¹ Gilboa tolo tsutsughu mu atsuzumu qipuku pemoniu; Tipau qhalo aluza pelono kumsa shivepeniu! Kughengu amlo kiviu zutoqo tileno kuthakugha shi ikiqivepeke; Saul zuto hu teli no suphe movae.

²² Jonathan suzu eno Saul zutakihiye ighono akumtou aghumi kimiye mono ghiqhi heqhi lucheke.

²³ Saul ngo Jonathan pamaye akumzapu eno kimiyekepu kumtsa xu ache eno kumtsa thivae; aluqu nguno akumthuu eno abongushuqo nguno akumtou ke.

²⁴ Israil totimiqo, Saul ghenguno mlo qalo! Pano hughughuyikeu phino kupukuno shi nongu puuke eno achiku ngo shuna pe nongu pipeke.

²⁵ Amlo kivimi ghushimi ikiqi khava, Panonguye aghushiqa lono heqhi pithiva Jonathan ye ato lono thi aghive.

²⁶ Ithiazu Jonathan, niye oghenguno imlo imeva; Noye ighenguno kiutoi akughupu kya! Noye kiutoi ilau kimiye keu akumzapu kya! Totimi kikimiye nguno akiviu ke.

²⁷ Amlo kivimi ghushimi ikiqiva Panongu ghunanu ye qhiva eno avehupu shimovae. “