MALAKI 2 - BAIBEL (BSI)

¹ Aqokitikhi MPEU no achinemi vilo pi, “Ahza kutsu hipauye nongu ghengunoke:

² Nonguno mla ithakeulo igihu kepu shimasa. Nonguno ino pikeu inimo aye ino nongu shou musuini keu sughi nani. Nongu chuqupu ithulu keu shou ino musuini bevetsu nani. Mutsuqheyino, ino tipaqo shou musuini bevae kughengu nonguno ino ahza tsukeu amlo tsuqhiyi ikhilumoke.

³ Ino nongu tianuli ghimeqhi nani eno nonguno aghashi mllakeu bazulo nongu gi kuxupho tsu nani eno nonguye abazu gholo pewuve nani.

⁴ Tileno nonguye ino ahza hipau tsukepi ithi nani, tishianguno achinemi, Levi laghami sasu iwu puloshoqhi shipuakeu kubovemo nani.

⁵ “Iwu puloshoqhilo ino panoqo lau akuxupu eno akuxu kivi piqhitsuke eno ino panoqo tsukeu tipauke tishianguno panonguye isumsa qhoqhu peniyeke. Wovekeu tsalaqoloye panonguye isumsa eno iqhoqhuche putsa.

⁶ Panonguye kiuno achipi keno tipau kutsupiyeche eno akumou kutsupiyemoke. Panonguye isasu kulonikughuvui xucheke; kiuno achipi keno tipau panonguno shikeu likhi kumono kutami ghi alhoksa shimovepe nike panonguno kuphuke.

⁷ Achinemi kumlapu sajeye Alhou kighithi kuchou pesu timi shikapiye peniyeke. Timiqoye panoqo lau wuno ipulou shikalu kepue, kughengu panonguye Aqokitikhi MPEU ghinikishimiqoke.

⁸ “Ikemu nongu achinemiye alaghi achipiu vezuvae. Nongu kukutsu lono timi kutomo pelo akumou laghilo wuveapeke. Nonguye ino puloshoqhi nongu sasu shikeu kubolevae.

⁹ Tighenguno ino Israilmi pelo nongu jumithi pe nani kughengu nonguno ipulou ghobideke eno kughou nonguno iw timiqo kutsupiye keno nonguye kumtsu aphiphishi peithamoke.”

Alhou zulo Timiqo Mikuchokumo

¹⁰ Ningu kumtsu apu lakhike kumo kesha? Alhou lakhino ningu kumtsu lhopheke kumo kesha? Tishiaye ninguye kushiye lakhino lakhi vilo ashoqhi shikeu kuboleve cheni eno kushiye Alhou no nipuasu sasu puloshoqhi shikeu jumithi cheni kya?

¹¹ Juda lo akemino Alhou lau ashoqhi shikeu kuboleve eno Jerusalem lo ngo aghakhuqha kumtsulo akuighupu lakhi shiveke. Panonguno AMPEU no kimiyechekeu chineki kitiqeveke, kiptimiqono totimi inaghami lhou mlla chekemi sasu kulakupu shiveke.

¹² Khuno hikithipu shipuani keno AMPEU no Israilmi muqo lono ikhivetsupe nike eno nishiayehqo no Aqokitikhi MPEU lau akumllagho peighikeulo timi tipau pelo itaghi khilemu kusaje movepe nike.

¹³ Nonguno hipau ghi shi acheni. Nonguno anhezu ngo akuqa kumlo pesu AMPEU mllakeu khache putsuqhi cheni, kughengu nonguno pa lau akumllagho sughikeu ikhilutsumoyeke.

¹⁴ Kushiye paye tipaqo ikhilutsu chemove akela pi nonguno iniju cheni. Tiye kutau ghenguno kumono nonguno lhothemi shiake lono sasu kulaukeu nipu lau nongu shoqhi kubolevekeu pano ithi ani kehue. Liye otunake eno nonguye Alhou zulono li lau amikucho shi xucheni keu tushoqhive kethiu ghi nonguno li lau ashoqhi shikeu kuboleveke.

¹⁵ Alhou ye opelo li sasu ashi aji lakhi anguagha lakhi shitsuke kumo kesha? Paye hipaulo kiu kumsupu puzu tishitsu kya? Tiye nonguno atianuli lhokeqo pelo kuchouno Alhou wu timi shipeniye ke. Tighenguno nongu gholo khunomu pututa nipu lau tushoqhive keu kubo kevilo.

¹⁶ “Niye kughuxakile keu mithike” ipi Israil Lhou AMPEU no pike. “Kughou nongu gholo khuno pa nipu peithakupsa kuxu hikithipu shi nikeno tiye ino mithi ke. Onipu lau amikucho shi xuche nikeu shi oshoqhi shikeu kubomo nike mutsuqhei shi achelo.”

Kughakuthapu Tsala Kupunuvae

¹⁷ Nongu tsa kuzano AMPEU ye angaghaive apeke. Ikeghi nonguno ishi inijuke, “Ninguye kishi puzu pa ngaghaivepe kya?” Ishi pikeu lonoke: “Aqokitikhi MPEU ye alhoksa kumlami kumtsu akivi kepi kumsu cheni; kuchouno paye panoqo lau alokivishi acheni.” Momu ishi pikeu lonoke: “Alhou amikuchou kepi chekeu huye khile ani kya?”