LESHELE 97 - BAIBEL (BSI)

Alhou no Ayehkipeu

¹ AMPEU ye akukau! Ayeghino alovilo! azughilo zudoyeghiqo, nongu alokivishilo.

² Khungkusu ngo zumoikeuno pa suhope ani; pano amikucho eno achipiu xakutha pesu ayehpe ani.

³ Amino pa zuu wupuzu pa ghumi pa sumxape akemi pitiqhike.

⁴ Pawu tsutsu kukulono ayeghiqha yepuvu; ayeghino ti ithulu kelo khokhoshive.

⁵ Ayeghi kumtsu shou AMPEU zulo naghutono aghughazu toi azu ilhove.

⁶ Kungughano pa mikucho pesu asheshu ani eno ashiayeh kumtsuno pa kimthe jukuvu ithuluke.

⁷ Ajulho shisuno mlachekemi kumtsu shikukujove; alhouqo kumtsuno AMPEU zulo itsaiqi.

⁸ Zion lo akemino alovi, eno Juda lo aphughi akeqono alokivishi kughengu owu kughakutha ghenguno, O AMPEU.

⁹ AMPEU Akughushuu, noye ayeghi kumtsulo ayehkipeuke; noye alhouqo nguno ihulokeu shi kijeke.

¹⁰ AMPEU ye alhoksa mithichekemi kimiye cheni; pano pawu timiqo kuxu pukhalu cheni; kixikilami kuka launo panoqo xaphelu cheni.

¹¹ Akuvuno amikuchomi shou yepuku ke, eno akivimi shou alovipukuke.

¹² AMPEU no kiu mlaqhi keno tipau ghenguno alovilo! Akimthe Lhou no kiu shitsukeno kumsululo eno pa shikimthilo.