LESHELE 96 - BAIBEL (BSI)

Alhou ye Akukau

¹ Alekithe lakhi phepe AMPEU shipililo! Ayeghiqha kumtsuno AMPEU shipililo!

² AMPEU shipililo eno pa sheqhelo! Tsalakipetsu pano nixaluvekeu tsakiviu pesu asheshulo.

³ Pa kimthe jekipi pesu ashiayeh kumtsu lau kutughu wolo, eno timi kumtsu vilo pano akughushu kumla shikeu asheshulo.

⁴ AMPEU ye kijeke eno akiqheu lono sheqhe kepuke; alhou kutauqo nguno alau pa gihu kepu.

⁵ Ashiayeh kutami lhouye ajulho shisukeu likhike, ikemu AMPEU no kungugha lhopheke.

⁶ Akimthe jukuvu eno kijeno pa sumxape ani; akuka eno jukivino pa chineki chhi ani.

⁷ Ayeghilo timi kumtsuno AMPEU sheqhelo; Pa kimthe jekipi eno kije hu sheqhelo.

⁸ AMPEU akimthe jekipi je sheqhelo akumlagho peighilo eno pa chinekilo ighilo.

⁹ Akimtheuno ipeghikelo pa zulo pishiqholo, ayeghi kumtsu pa zulo khokhoshi musalo.

¹⁰ Ashiayeh kumtsu vilo piwolo, “AMPEU ye akukau! ayeghiye mutotoi pa-alo shope puani eno kughutha mlake; AMPEU no achipiu xakutha pesu timiqo shou kughatha nani.”

¹¹ Ayeghi eno atsutsu alovilo! azughi eno tile lhoxu akeqo kumtsu ighalo;

¹² Aluzaqo, alovilo eno tile akeqono alovilo! Alokivi launo aghasalo asubono igha nani

¹³ tiye kughou AMPEU no ayeghi shou ayehpenike ighini keno. Pano achipiu xakutha ngo aghibiu lono ayeghilo timiqo shou ayehpe nani.