LESHELE 91 - BAIBEL (BSI)

Nisushokulu Lhou

¹ Timi khunono Shishe Akiqheu kicheqholo acheni. khuno Akughushuu sukusholo acheni keno,

² Tipanono pa vilo ishi pilu nani, “AMPEU, noye ighengu mujotsu chekeu eno isushokuluuke. Noye iLhou, oshou ino pukhu acheni.”

³ Pano tuqho tughou kumsapu lono oxaphepe pua nani eno akusu lhoksa kumtsu lono xaphe nani.

⁴ Pano pa chishibo pesu onhaluve nani; noye pano tucho hejupe qhive nani; pa pukhukulu huno osholuve eno oputukhaluve nani.

⁵ Putholomu noye akumsapu jupesu musa kepu kuha nani, momu zuleno puchou oleighikeu musakepu kuha nani,

⁶ Momu putholo pusa kusuno ohekelo ighumo nani momu akuvulo alhoksano heqhi pithikeu musa kepu kuhae.

⁷ Timi 1,000 kutolo ophivilo ikiqi thi aghiluvi 10,000 osuhupe aghiluvi, ikemu tipaqoye oshipusamo nani.

⁸ Nono jupuwu puzu kixikilamiye kishi aghime sholuve cheni keno ithulu nani.

⁹ Noye AMPEU pelono oshokhalukeu shipeke, shishe Akughushuu pesu osushokuluu shipeke.

¹⁰ ikehu shikupsaye oghaqhimo nani, heqhi buqhikeuye oki kupunu ighimo nani.

¹¹ Alhou no pawu kungumi hape okheluve nani; tipaqono nono khile khile wunamu osusholu nani.

¹² Panonguno pano u pesu okhape qheluve nani, tishianguno atu lono opukhu pusupemoni kehu.

¹³ Abongushu yikusa ngo tughu kupu pighi shi aghinamu nono qodaneda luve nani.

¹⁴ Alhou no pi, “Ino ikimiyechekemi xalu nani, eno khunono niye AMPEU kepi ithiani keno tipaqo susholuve nani.

¹⁵ Kughou panonguno ikuni keno ino khochile nani; panonguno shiluksalo akelo ino panoqo gholo anani. Ino panoqo xaphelu eno panoqo suqhepuku nani.

¹⁶ Ino axukushu pesu panoqo saxu shitsu nani, ino panoqo xalu nani.”