LESHELE 85 - BAIBEL (BSI)

Shiyeh Kivipu Ghengu Inikhu

¹ AMPEU, noye oyeghi shou kimiyeqhiyikeu ake; nono Israil pelo itaghi kinikulu shilu anipe.

² Nono owu timiqo xine peivetsu, eno panonguno pimivekeu qhikhavetsue.

³ Panongu lau axuide chekeu tishimove eno aloghu kighide panongu launo suchileveke.

⁴ Ni xukithe tsulo! O nixakuluu Alhou, eno nilau aloqimono achekeu tavelo!

⁵ Noye pulhapujulo nilau axuide acheni kesha? Oxukighideye tavemoni kesha?

⁶ Nipelo itaghi xukithelu pemo kesha? Ningu owu timiqono osheqhe nani.

⁷ Owu iqemokeu kikimiye ningu piyelo, O AMPEU eno owu xakulu kukuphu ningu tsulo.

⁸ Niye AMPEU Alhou no kiu piani keno chiluni; ninguno anikha laghilo wokithemo aye pawu timiqo lau pano alokughuno tsunipi piqhi puanike.

⁹ Kuchouno khunoqono pa gihuni keno paye tipaqo xalunikeu kutope ani, eno niyeghilo pawu xalu ache nani.

¹⁰ Kikimiye ngo pukhukilekulu kushokilelu nani; amikucho ngo alokughunoye kuvakileluve nani.

¹¹ Timino Alhou qhoqhukeu ayeghi kudauno kunguu ikuto nani, Alhou mikuchono kungugha lono jupiqi nani.

¹² AMPEU no ningu pelo kinikulu shilu pe nani, eno ni yeghino kinikulu shi ghilehu nani.

¹³ Amikuchono AMPEU zulo wupuzu pa ghenguno alaghi hu kutokupuipe qhi nani.