LESHELE 83 - BAIBEL (BSI)

Aghumi Tolunikeu Kighini

¹ O Alhou, inaqhoi auve kevilo; Ithamono akevilo, iqunei auve kevilo!

² Julo, aghumiye mubumughu anike eno omithi chekeqono pano kutsu shohe ithughivae.

³ Panonguye owu timiqo shou tuqhouno kuchughu anike; nono sushope akeqo pithiveniye kumqu anike.

⁴ Panonguno ishipi, “Ighilo, ningu pano shiayeh kutsaveni, tishianguno Israilmiye alhokupujulo kumsumavenike.”

⁵ Panonguno kuchughukelo kumtsu no pulokuqha ani eno oshou amlo lakhi shipesu ani:

⁶ Edommi, Israilmi, Muabmi, Hagritmi,

⁷ Gebalmi, Amunmi eno Amalekmi, Filistiyami eno Turmi.

⁸ Asiriya ghi panoqo gholo kuqha ani Lot nuliqono mutotoi keu shompami shike toi.

⁹ Nono Medianmi shou kishi shi tsukeno panoqo laughi tishi shitsulo, eno Kishon ghokilo Sisera ngo Jabin lau shike toi shitsulo.

¹⁰ Nono Endor lo panoqo shou toluveke eno panoqo phimpiye ayeghilo tsumunauveke.

¹¹ Oreb ngo Zeeb lau shiketoi panoqo sakiphemi laughi kutotsulo; Zeba ngo Zalmuna lau shiketoi panoqo sakiphemi shou toluvelo,

¹² Panonguno pike, “Alhou yeghi hu niwu shikepushi nino luvenike.”

¹³ Ayeghi mukhu toi panoqo halevelo, O Alhou; amlhuno aghijini fupewuve ketoi shitsulo.

¹⁴ Amino aghasa pitimuha keshi eno ami milino naghuto piti keshi,

¹⁵ Owu pasapaghano panongu haku qoqhilo, eno amlhu kusano panoqo shithughuyilo.

¹⁶ Akukujono panoqo gi kuzuvetsulo, O AMPEU eno panongu pelo okuka michilupelo.

¹⁷ Panonguye alhokupujulo tomovepe eno shithughuyipe qhilo; kujomuza keu lono panongu pelo thipelo.

¹⁸ Panongu pelo olikhino AMPEU kepi ithipelo, ayeghi kumtsu shou thwokhalo AMPEU.