LESHELE 80 - BAIBEL (BSI)

Ashiayeh Sachilekulu Kighini

¹ O Israil kheu, ni kighini initsulo chilutsulo, Nono bheri loji sasu wukeshi Josef laghami sasu wulo! No, kerubim chishibo shou iqa ngo achekeu;

² Efraim, Benjamin eno Manase lagha lau olikhino pepiyelo; okumto ningu piyelo eno nixalulo!

³ O Alhou, ni xukithe tsulo! Ni xaluve kepushi okikimiye nilau piyelo.

⁴ O AMPEU, Akughushu Lhou, noye khitotohi owu timiqo kighini shou axuide anani kya?

⁵ Nono ni pelo amlo ghime ilhupeke, anhezu jukhu kijelo yepeke.

⁶ Nono ni sumxape akeqo shiayeh pelo ni yeghi shouno aghushi peke; nighumino ni piputhake.

⁷ Akughushu Lhou, ni xukithe tsulo ni xaluve kepushi okikimiye nilau piyelo!

⁸ Nono Ijip lono atsaibo lakhi suipe ghike; nono ashiayeh kutami hapupo veno tipaqo yeghilo tipau tsaibo shosuke.

⁹ Tipau pelo thuwu penike nono a-a lakhi shikimthe, tipau kuhu thonhei quilove eno tiye ayeghi kumtsulo nhakhaluve.

¹⁰ Tipau kicheqhono naghutoqo kuzu luve, tipau lokaqono kedar subo kuloghi sholuve.

¹¹ Tipau lokaqono Mediteriya zughi kutolo quwuke eno Eufrati ghoki kutolo quwuke.

¹² Alhou, noye kushiye tipau putukha keu hephovetsu kya? Itehiye tipau vechewu chekemino tipa xathi pukaluve ani;

¹³ Aminino tipau qodave ani eno tughashino tipau chuve ani.

¹⁴ Ni lau ideghilo, Akughushu Lhou! kungugha lono ni shou jupiqi tsulo; ighino owu timiqo xalutsulo!

¹⁵ Ighino nono atsaibo shosukeu xalulo, atsai khuni nono thuwupe no mutotoive keu hu!

¹⁶ Ni ghumino tipaulo ami supuzu micheqhive ani; oxuide ni ghumiqo julo eno panoqo kutsavelo,

¹⁷ Nono kisheluvekemi nono shikumtokeu shiayeh owu timiqo khekutono susholulo.

¹⁸ Ninguye khilemu itaghi olauno idesu womoake, ni puxutsulo eno ninguno osheqheni.

¹⁹ Akughushu Lhou, ni xukithe tsulo, Ni xaluve kepushi okikimiye ni lau piyelo.