LESHELE 72 - BAIBEL (BSI)

Akukau Ghenguno Inikhukeu

¹ O Alhou, akukau pelo ami kucho lono kughatha peni keu shikalo; Ochipiu xakutha pesu pa sasu kusajelo,

² tishianguno paye amikucho xakutha pepuzu owu timiqo shou ayehpelu nanike, eno amikucho xakuthano owu timi kumlhomi kuphulu nanike.

³ Ayeghi pelo kinikuluno aghaqilu pelo, eno tipaqo pelo amikucho peithalu pelo.

⁴ Akukauye kumlhomiqo shou aghibiu lono kughathabelu pelo; aquaghami kuphulupe eno nedaqoda chekemi halevepelo.

⁵ Tsukinheno yepuvu ake kutolo owu timiqo pelo omllalu pelo, ighinikeu loghi aqhino akuvu tsuake kutolo omllalu pelo.

⁶ Akukauye aluzalo tsutsughu ighike toi shipelo, ayeghi shou ghuqhi puku akehu toi shipelo.

⁷ Pa kuxu thaqhulo amikuchono thuwulu pelo, eno aqhino akuvu ake kutolo alokughuno no chhi apelo.

⁸ Pa kukaqhaye azughi lono azughi kuto apelo, Eufrati ghoki lono ayeghi shekichi kuto.

⁹ Timi kughunamoke alo achekemi qono pa zulo pishiqho nani; Pa ghumi ghi ayeghilo iluqi pa gihu nani.

¹⁰ Spain lo akukau ngo zudoyeghilo kukamiqo no agho pewo pa gihu nani; Arabia ngo Ethiopia lo kukami ghi agho pewo pa mlla nani.

¹¹ Kukami kumtsuno pa zulo pishiqhope gihu nani, ashiayeh kumtsuno pa qe nani.

¹² Paye kumlhomino pa vilo kuphutsu lopi kukemi xaphelu cheni, aquaghami eno timino tuchomujo move kemiqo xaphelu cheni.

¹³ Paye kumlhomi eno miqemileyi kemiqo kimiyekutu cheni; aquaghami kuxu pano xalu cheni.

¹⁴ Nedaqodakeu eno heqhi buqhi keu lono pano panoqo xaphelu cheni; Panongu kuxuye pa zulo amekushoke.

¹⁵ Axupushulo, akukau! Arabia lono shunayi pa tsu peniu ado kumtsulo pa ghenguno inikhu tsu apeniu; Alhou kukumgha pulhapuju pa shou apeniu!

¹⁶ Ayeghilo aghi asu kupukunoshi apeniu; axajelino naghutoqo kuzupe apelo; ti Libanon toi athi pithikeu shilu pelo. Aphughiqolo timi kutomo apelo, tiye aluzalo atsaneghu chhitoi aketoi.

¹⁷ Akukau je pulhapuju haumono achepelo, tsukinhe ake kutolo pa jekipino tishi apelo. Ashiayeh kumtsuno pa sheqhe pelo, panongu pelo Alhou no panoqo kumghatsu penike iniju pelo, akukau lopivipeni keu panongu pelo kumsulu pelo.

¹⁸ AMPEU sheqhelo, Israilmi Lhou! Pa likhino akumzapu kumla hipaqo shichenike.

¹⁹ Alhokupujulo paje kipipu sheqhelo! Pa jukuvuno ayeghiqha kumtsu chhilu pelo. Amen! Amen!

²⁰ Hiye Jese nu David no akighini shikeu ashekha shiani.