LESHELE 7 - BAIBEL (BSI)

Achipiu Xakutha Kighini

¹ O AMPEU ILhou, niye oshou pukhube ani; ixalulo eno ihachekemi launo ixaphelulo;

² Panonguno abongushu toi isunhe sawuveni cheni eno khunomu ixamla veno panonguno isutha pinyive nosake.

³ O AMPEU iLhou, ino timi kutami lau pimi puaghi,

⁴ Shompami lau alhoksapu tsuchile puaghi, momu kutsazu lono ighumi shou puqapinyi puaghi, ino hipaqo lakhimu shipuaghi aye,

⁵ ighumino ihakuqono itsuquluve pelo. Panoqo pelo ighiqhi pithive pelo eno ikuxu mukhumuno shipe qhivepelo!

⁶ O AMPEU oxuide ghi ithughilo, ighumino aghaide akeu shou nono shokhaluvelo; ikuphu kepushi ithulo, iLhou! Noye achipiu-xakutha khu cheni,

⁷ ikehu timiqo osuhupe sawo kumqolo eno kunguuno panoqo shou ayepelo.

⁸ AMPEU no timi kumtsu shou kugha kuthauke, ishou xatha pivilo, O AMPEU, niye amikucho kepi nono ithi ani.

⁹ Kusakughamino alhoksa kumla shichekeu hakhave tsulo, Ikemu amikuchomi xaqhelo. Nono timi mlo eno timi kukumsu lheju chekeu, noye amikucho Lhou ke.

¹⁰ Alhou ye izuto ke, Amlo kimthemi pano xalu cheni.

¹¹ Alhou ye achipiu lono kughatha chekeu, alhokupujulo alhoksa shou axuidechekeu Lhou ke.

¹² Timino akuxu xukithe luvemo aye, Alhou ye pa zuta chighuve nani. Pano pa suzu sukihipe ngoluve nani;

¹³ paye akithipu zuta-angu kutope puani, pa pijilo ami kuiqu ani.

¹⁴ Julo kusakughamiye alhoksa kumsupu acheni; akupuna kuchughu acheni eno pishi kiqhi pephe cheni.

¹⁵ Panonguno kutami ghenguno aqoh chhupe qhicheni, ikemu pano likhi pano qohlo ilulove cheni.

¹⁶ Panonguno akupuna kuchughukeu huno pano-kutsu shou ide ikughive cheni, eno panono heqhi buqhichekeu huno pano ghuza cheni.

¹⁷ Ino AMPEU shikimthini kughengu pano achipi lono xathake; AMPEU, shishe Akiqheu je ino sheqhe shipilini.