LESHELE 68 - BAIBEL (BSI)

Ashiayehno Tokulu Shilu keu

¹ Alhou no ithughi puzu pa ghumi halevepelo. Khunono pa mithi chenikeno pa zulo koha poke!

² Amichhi fusasu wuveke toi panoqo hapupoke; ami phivilo aghughano azu ilhovekeshi kixikilamiye Alhou zulono hauve cheni.

³ Ikemu amikuchomiye Alhou zulo alokivishi amloqi cheni; Panonguno alovi puzu igha cheni.

⁴ Alhou shipililo, paje sheqhe shipililo; khungkusu shou ikupuzu chekeu ghenguno alaghi lakhi kutope qhilo. Pajeye AMPEU ke, pa zulo amlo kiqi shilo!

⁵ Pa kimthe chinekilo ngochekeu Alhou ye mighimgha ngo chime miqo susho eno tuchohiju cheni.

⁶ Pano aki alu kuhakemiqo aki ngolu kepu tsucheni, eno akughumiqo pelo alokivishi ililaikeu lo saipe cheni; ikemu pahe kibidemiye qhayike yeghi lo xu cheni.

⁷ O Alhou, kughou nono owu timiqo zulo wuchekelo, eno timi kughunamoke alo vechewuche kelo;

⁸ ayeghino itha eno atsutsu lono tsutsughu ghuqhike, kughengu Sinai Lhou ighike, Israilmi Lhou ighike.

⁹ Nono tsutsughu kumzapushi ghuqhi tsu eno ayeghi qhaivekeu hu amheghipu shichiletsu;

¹⁰ Owu timiqono tipa yeghilo ngo kepu-a shilu; eno nono akivi kehu kumlhomi pelo achuqupu ithulupeke.

¹¹ AMPEU no ahza tsuke eno aqo kitikhino asutsa pesu wuke:

¹² “Kukami ngo panoqo wu ghushimi no kohakhave!” Totimi akilo akeqono tipaqo nhemgha kijeluve;

¹³ Nono bheri lojilo ihozuvemu noye tsandi yino amiqhi chishibo kuzupe akeshi, eno pa mhino shunayi phuphuyi keuno kuzupe aketoi ke.

¹⁴ Kughou Alhou Akughushuuno Zalmon Toghilo kukamiqo hale keno, panoqo shou murasu qi pukuke.

¹⁵ Bashan naghutoye kiutoi akuloghi kela, hiye atoghi kutomo akeu naghutoke!

¹⁶ Kushiye Alhou no ngochenikeu shi kishelukeu Zion naghuto ju anheshu ani kya? AMPEU no alhokupuju tilehi ngoche nani!

¹⁷ AMPEU no Sinai lono pawu khurkulu kutomo qhethonhe kutolo sasu akimthe-alo ighi.

¹⁸ Pano aghumi leluvekeqo pa gholo no sasu qhemghaikeu-alo ikuke; pano hekibidemi launo mllakeu gho ikhilue. AMPEU Alhou no tile ngoche nani.

¹⁹ AMPEU khuu tsalakipetsu nimakho xapuqhetsu acheni keno pa sheqhelo; Alhou ye nixakuluuke.

²⁰ NiLhou ye xakuluu Lhou ke; eno Alhou, AMPEU lau akithi lono nixaphelu keu ani.

²¹ Khunono pano xine laghi phemono checheni keno Alhou ye kuchouno pa ghumi boghe hephotsu nani.

²² AMPEU no pi, “Ino noghumi Bashan kudauno saideghi nani; Ino azughi kutho lono panoqo saideghi nani,

²³ tishianguno nonguye panongu ji kuqolo mihi penike, eno nongu tsuqono aghakiqishi tipaqo ji minelu penike.”

²⁴ O Alhou, nono ahukulushi shekujo chekeu kumtsuno ithuluke, ILhou, iKukauno akimthe-alo shekujo ilokeuhu.

²⁵ Alekiphemino azuushi, alebo kuighamino athiu shi, eno panoqo mtalo ilimiqono turu lebo peke.

²⁶ “Alhou timiqo kuhokumqo akelo Alhou shelo; Nongu Jakob laghami AMPEU sheqhelo!”

²⁷ Atughushi, Benjamin laghami, ti alagha aghulou paghi ighi, tipashelo, Juda laghami sakiphe mino pano loji sasu ighi, eno tipau papesu Zebulun ngo Naftalimi sakiphemi ighi.

²⁸ Okuka kughushu piyelo, O Alhou! O Alhou, nono nighenguno peitha keu kuka hu piyelo;

²⁹ Jerusalem lo ochineki khilehi kukamino agho suwo otsukeno tipau kudauno piyelo.

³⁰ Ijip sakiyilo, amtulilo tughashi achekeu; Panonguno pishiqho pesu tsandiyi no shikeu agho otsumoke kutolo, ashiayeh kutami amshitsu ati sasu akeqo hu sakiyilo. Timi khunoqo aghu shini chenikeno hapiye pighivelo!

³¹ Ijip kudauno lashikami ighi nani; Sudanmino au peqhepesu Alhou vilo khuini nani.

³² Ayeghilo akukaqha akeqo Alhou shipililo AMPEU sheqhe shipililo,

³³ Khaghi atsutsu shou iku puzu che chekeu huno ighamuku akeu tsa inilo. Pa ghugha kuloghi inilo.

³⁴ Alhou ye akuka kepi kutughulo, pa jekipiye Israil shou ani; Pa kumto kughushuye atsutsulo ani.

³⁵ Alhou no pa kimthe-alo ighikelo kiutoi akuighupu kela! Israilmi Lhou, pano akuka eno akumto paw timiqo tsucheni. Alhou sheqhelo!