LESHELE 6 - BAIBEL (BSI)

Shilukusalo Kighini

¹ O AMPEU, omlo kighidelo ilomi pikevilo, momu ologhu kighidelo ishikumzu keu ghime tsu kevilo.

² Ikimiyekutu tsulo AMPEU, kughengu niye ighono lhovae! O AMPEU, ishipivitsulo, kughengu ighi kumtsu sakutuvae.

³ Ingulho ghi kuchopu shishe sakutu ani ikemu AMPEU, noye ado khitotohi tishi auve akya?

⁴ O AMPEU, xatsughu ighino ixalulo; okikimiye huno akithi lono ixaphetsulo.

⁵ Kithimi gholoye okumsuchilelu chemoe, khuno kithighau no akishe otsu kulupu kya?

⁶ Amlo ghime lono niye shishe qeyivae; kijili atsu-tsu izu-a lono anhezu piji acheni, Ikuqakumlo nhezuno ikutsukumkhu putsuvae.

⁷ Amloksa lono inhethi ghi chuchu miyivae; ighumino ipuqa kelauno inhethiye ingughuyivae.

⁸ Nongu alhoksa kumlami kumtsu ilauno chevelo! Kughengu AMPEU no ino qa akeu sutsa chilu ani,

⁹ ino qhuiniju akeu AMPEU no chilu ani, pano ikighini khochiletsu nani.

¹⁰ Ighumi kumtsu pelo tomlavepeno akukujo kitikhi sholupe nani. Paikhavino panongu halepuwuveno shikukujove nani.