LESHELE 56 - BAIBEL (BSI)

Alhou Pukhukibe Kighini

¹ Ikimiyekutu tsulo, O Alhou, kughengu ighumino ineda qoda ani; Ado kumtsulo aghumino ishiki ghimeqhi anike.

² Atsala kupujulo imujochilekemino iha cheni. Isasu kuluakemiye kumzapu ke.

³ Kughou ino musaveni keno, niye opukhu cheni.

⁴ Ino Alhou pukhube eno niye musa ichimoe. Pano kiu piqhikeno tipau ghenguno ino pa sheqhe. Timi lhoxuye ishou kiu shikulupu kya?

⁵ Ighumino atsala kupujulo ishipusa acheni; panonguye pulhapuju ighuza niye kuchughu cheni!

⁶ Panonguno hekutsukumqo pesu itshu acheni, eno ino mlaithakeu kumtsu jukuto acheni, tiye ipithive niye khe acheni.

⁷ Ikehu, panoqo lhoksa ghenguno ghimeqhilo, O Alhou; Ologhu lono panoqo hekuluvelo!

⁸ Niye kishi shiluksa shi acheni keno nono ithi ani; inhezu hekutsu pesu okulabolo suluvelo, Tipaqoye owu kakulo yepesu puamo kesha?

⁹ Khipa tsala lono ino ovilo pinikeno ighumiye athiu idewove nani. Ino hi ithiani ike Alhou ye ikudau anie.

¹⁰ Alhou tsa ino sheqhe cheni. AMPEU khuuno piqhikeno ino tisheqhe cheni.

¹¹ Pa shou ino pukhu cheni eno niye musamoe. Timi no ishou kiu shikulupu kya?

¹² O Alhou, ino ovilo piqhivekeu shikupu ni; ino shikimthikeu kumllagho pesu otsuni,

¹³ kughengu akithi lono ixaphelu eno ino iluqiveni chekeu lono puthu gholupeke. Tiye ipelo Alhou zulo xuluno kuxumi shou yepuvulu peniyeke.