LESHELE 5 - BAIBEL (BSI)

Sushopenikeu Kighini

¹ O AMPEU, itsa initsulo; ino mlominiyi ighakeu chilutsulo;

² Ikukau ILhou, ikuphupenike ighamukukeu initsulo; kughengu olau ino inikhu anike.

³ O AMPEU, nono inaqhe isutsa chilu ani; ino inaqhe akumllagho oghengu no kutope ani eno olaju khe ani.

⁴ Kusakugha kumlalo noye aloqichekeu Lhou kumoe, ogholoye alhoksa sachemoe.

⁵ Aqhekuzamiye ozulo puthugho mlae; nono alhoksa kumlami kumtsu mithike.

⁶ Kimkimi kumtsu nono kutsave cheni; Timi ghiqhi nishikemi ngo pishi kiqhimiye AMPEU no jukuchhube cheni.

⁷ Ikemu okikimiye iqemokeu vechewo niye okilo ighilu nani; eno osuku msa vechewo ino ochineki kimthelo omllalu nani.

⁸ O AMPEU, ighumi kutomo anike ghenguno opulou shini keulo isawulo; izulo olaghi mutsumishei shitsulo.

⁹ Ighumino pikeu tsaye pukhu kulupu kuhae; panongu loloye shikupusapu likhike. Panongu kughokiye lhaphepuakeu kumokike, eno panongu milino pishikiqhi tsa picheni.

¹⁰ Panongu kileqhiveno ghimelo, O Alhou; panoqo pelo pano muqu lo ilulo pelo. Panongu xine kumzapuke ghenguno panoqoye ozulono haphevelo, kughengu panonguno ohebide ipeghike.

¹¹ Ikemu osuije chekemi kumtsu alovilu pelo, panongu pelo alo kivi launo alephelu eno okimiye chekemiqono ogholo aitelu pelo.

¹² O AMPEU, nono amikuchomi kumghatsu cheni; okikimiyeno azuto toi panoqo susholu cheni.