LESHELE 41 - BAIBEL (BSI)

Kusukinimi Kighini

¹ Khunono kumlhomi jukuto kugho cheni keno tipano lokivipue; kughou pano shilusani keno AMPEU no pa xaphelu nani.

² AMPEU no susholu nani eno pa kuxu puxupe qhicheni; pano akeu yeghilo alokivipu timi ipi kuniae; AMPEU no pa ghumi gho apuloulo pa phesuvemo nani.

³ Pano kusukini shiveno azua dapesu akelo AMPEU no shikumto nani; pa kusukini kumtsulo shipivilupe nani.

⁴ Ino pi, “O AMPEU, ino oshou axine shivae; ikimiyekutu puzu ishipivilo!”

⁵ Ighumino axekusu tsa pike Paye kughono thini cheni eno paje kughono kumsuma luveni kela!

⁶ Khunono iputsa ighini keno kuchou tsa pichemoe; Panonguno alhoksa-sutsa ighe nguno hekutsu pesu acheni, eno khalau ipe puzu aqha kumtsulo tipau lhe cheni.

⁷ Imthichekemi kumtsuno kuqhano ighili kugha cheni; panonguno ilhoksapu likhi kumsupu acheni.

⁸ Panonguno pikeuno, “Paye thini keshi suani: paye azu-a lono khilemu ida thughimae!” ipicheni.

⁹ Ishou kiviu, khikhi ino pukhube acheni keno eno isasu kuchukusho lakhi shichekeu thotsu ilau chhophekugha vesu auvae.

¹⁰ Ikimiyekutu tsulo, O AMPEU eno ishi-aji shipivi kithe tsulo, ino ighumiqo lochile tsunike.

¹¹ Tishikeu lono ighumi pelo ishou toluvepemo nanike, eno noye ilau amlokiqi ani kepi ino ithilu nanike.

¹² Nono ikuphu nani kughengu kiuno achipi keno tipau ino shicheni; eno alhokupuju ozulo ipelo ngolupe nani.

¹³ AMPEU sheqhelo, Israilmi Lhou! Itehi eno alhokupujulo pa sheqhelo. Amen! Amen!